दिग्दर्शिका कल्पना लाजमी रुग्णालयात

मटा ऑनलाइन वृत्त । मुंबई

मूत्रपिंडाच्या कॅन्सरनं त्रस्त असलेल्या दिग्दर्शिका कल्पना लाजमी यांना कोकिलाबेन रूग्णालयात दाखल करण्यात आलं आहे. त्यांच्या औषधोपचाराची संपूर्ण जबाबदारी 'द इंडियन फिल्म अँड टेलिव्हिजन डायरेक्टर्स असोसिएशन', आमीर खान व रोहित शेट्टी यांनी घेतली आहे.

सुप्रसिद्ध गायक, संगीतकार भूपेन हजारिका यांच्या पुण्यतिथीच्या कार्यक्रमात सहभागी होण्यासाठी लाजमी रविवारी नवी मुंबईला गेल्या होत्या. तिथं त्यांना अचानक अस्वस्थ वाटू लागलं. तिथून तडक त्यांना रुग्णालयात नेण्यात आलं. बॉलिवूडमधील अनेक कलाकार यावेळी त्यांच्यासोबत होते. सध्या त्यांच्यावर अतिदक्षता विभागात उपचार सुरू आहेत. लाजमी यांच्या प्रकृतीत हळूहळू सुधारणा होत असून लवकरच त्यांना डिस्चार्ज दिला जाईल, असं डॉक्टरांनी सांगितलं.

लाजमी यांनी 'एक पल', 'रुदाली', 'दरमियाँ', 'क्यों? आणि 'चिंगारी' यांसारख्या वेगळ्या पठडीतील चित्रपटांचं दिग्दर्शन केलं आहे. याशिवाय त्यांनी 'लोहित किनारे' या टीव्ही मालिकेचंही दिग्दर्शन केलं आहे.