'द कश्मीर फाइल्स' काश्मिरी पंडितांची व्यथा मोठ्या पडद्यावर

मुंबई: जम्मू-काश्मीर राज्याची पुनर्रचना, लडाख राज्याची निर्मिती, कलम ३७० मधील तरतुदी हटवण्याच्या केंद्र सरकारने घेतलेल्या ऐतिहासिक निर्णयानंतर बॉलिवूडमध्येही या विषयवर आधारित चित्रपट निर्मितीसाठी निर्मात्यांमध्ये चढाओढ पाहायला मिळतेय.

'द ताश्कंद फाईल्स' या चित्रपटानंतर दिग्दर्शक विवेक रंजन अग्निहोत्री यांनी 'द कश्मीर फाइल्स' या चित्रपटाची ट्विटरवर घोषणा केली आहे. एक पोस्टर प्रदर्शित करून अग्निहोत्री यांनी चित्रपटाबद्दल माहिती दिली. पोस्टरवर भगव्या रंगामध्ये तारांच्या सुरक्षा कवचात जम्मू- काश्मीरचा नकाशा दिसत आहे. चित्रपटात काश्मिरी पंडित' हा मुख्य मुद्दा असून कलाकार कोण-कोण असतील याबद्दलची माहिती सध्या तरी गुलदस्त्यात ठेवण्यात आली आहे. पुढच्या वर्षी हा चित्रपट प्रेक्षकांच्या भेटीला येणार आहे.


कलम ३७० हटवल्यानंतर अनेक चर्चा सुरू आहेत. बॉलिवूडमध्ये देखील या निर्णयावर मत मांडणारे दोन गट असून यापूर्वी देखील अनेक बॉलिवूड चित्रपटांमधून काश्मीरच्या मुद्द्यावर अप्रत्यक्षपणे भाष्य करण्यात आलं होतं.