सुरवीन चावलानं सांगितले 'कास्टिंग काउच'चे भयंकर अनुभव

मुंबई: 'मीटू'चं वादळ शमते न शमते तोच 'कास्टिंग काउच'चं भूत समोर येऊ लागलं आहे. अभिनेत्री सुरवीन चावला हिनं याबाबतचे भयंकर अनुभव जाहीरपणे सांगितले आहेत. 'एका दिग्दर्शकानं माझ्या मांड्या बघण्याची इच्छा व्यक्त केली होती,' असं तिनं म्हटलं आहे.

सुरवीननं 'कही तो होगा' या टीव्ही मालिकेतून आपल्या अभिनय कारकिर्दीला सुरुवात केली होती. त्यानंतर तिनं बॉलिवूडबरोबरच तेलुगू, तामिळ व कन्नड चित्रपटांत भूमिका केल्या. 'हेट स्टोरी २' मध्ये देखील तिची प्रमुख भूमिका होती. सिने क्षेत्रात प्रवेशाच्या काळात मला पाच वेळा 'कास्टिंग काउच'चा सामना करावा लागला होता, असं तिनं म्हटलंय. त्यातील तीन अनुभव दाक्षिणात्य सिने इंडस्ट्रीत तर २ अनुभव बॉलिवूडमध्ये आले होते. काही डायरेक्टर मला तोकड्या कपड्यांत बघू इच्छित होते तर, एकानं माझ्या मांड्या बघण्याची इच्छा व्यक्त केली होती,' असं तिनं सांगितलं.
'अवघं ५६ किलो वजन असतानाही मला ओव्हरवेट म्हणून हिणवलं जायचं. सिनेमांमध्ये प्रवेश मिळवण्यासाठी मला टीव्हीच्या अनुभवाचा काहीच फायदा झाला नाही,' असंही ती म्हणाली.