हिरॉइन्सनी नेहमी सुंदर, ग्लॅमरस दिसलं पाहिजे असा जणू इंडस्ट्रीचा अलिखित नियमच आहे. पण, अनेक अभिनेत्री आता चौकटीबाहेर पडत धाडसी भूमिका स्वीकारु लागल्या आहेत. जाडजूड, टक्कल अगदी दुर्दैवी अॅसिड हल्ल्यामुळे विद्रूप झालेला चेहरा अशा खूप वेगळ्या भूमिकाही त्या स्वीकारताहेत.
मुंबई टाइम्स टीम
हिंदी चित्रपटात हिरॉइन अनेकदा येते तीच मुळात ग्लॅमरस चेहरा म्हणून. पण, मोठ्या पडद्यावर नेहमी ग्लॅमरस लुकमध्ये दिसणाऱ्या अभिनेत्री आता खूप वेगळ्या भूमिकांमध्ये दिसू लागल्या आहेत. आपल्या भूमिकांबाबत त्या आणखी जागरुक झाल्या असून, लूकवर किंबहुना भूमिकांवर प्रयोग करण्याची त्यांची तयारी आहे. त्यांना फक्त आकर्षक दिसणं, मेकअपच नव्हे, तर दमदार भूमिका हवीय. भूमिकेसाठी जाड, डस्की, टक्कल किंवा चेहऱ्यावर झालेला अॅसिड हल्ला अशा लुकमध्ये येण्यासही त्या मागे-पुढे बघत नाहीत.
दिग्दर्शक मेघना गुलजार यांच्या आगामी 'छपाक' सिनेमामध्ये अॅसिड हल्ला झालेल्या लक्ष्मी अग्रवालची कथा पाहायला मिळेल. यात लक्ष्मीची भूमिका अभिनेत्री दीपिका पडुकोण साकारणार आहे. दीपिकानं जेव्हा ही भूमिका स्वीकारली तेव्हा तिच्या चाहत्यांसह बॉलिवूडकरांच्याही भुवया उंचावल्या. नेहमी ग्लॅमरस लुकमध्ये वावरणारी दीपिका ही भूमिका कशा प्रकारे साकारेल याविषयी बीटाऊनमध्ये चर्चा होऊ लागली. दीपिकाचा लक्ष्मीच्या भूमिकेतला लुक जेव्हा प्रेक्षकांसमोर तेव्हा अनेकांना आश्चर्याचा धक्का बसला.
बॉलिवूडच्या आणखी काही अभिनेत्रीही अशा प्रकारचं धाडसी पाऊल उचलताना दिसताहेत. 'मसान'फेम श्वेता त्रिपाठीनं गेल्या आठवड्यात प्रदर्शित झालेल्या 'गॉन केस' सिनेमात प्रो टक्कल केलं होतं. 'गँग्ज ऑफ वासेपूर' सिनेमात रिचा चड्डानं आपला ग्लॅमरस लुक बाजूला ठेवून चक्क आईची भूमिका साकारली होती. तर 'नील बट्टे सन्नाटा'मध्ये स्वरा भास्करनं देखील आईची भूमिका केली होती. अभिनेत्री अनुष्का शर्मानं 'झिरो' सिनेमामध्ये व्हीलचेअरवर असलेल्या शास्त्रज्ञाची तर 'ए दिल है मुश्किल' सिनेमात टक्कल असलेली भूमिका निभावली होती. भूमी पेडणेकरनं 'दम लगा के हईशा' सिनेमासाठी तब्बल तीस किलो वजन वाढलं होतं. तर 'डर्टी पिक्चर्स'साठी विद्या बालन आणि 'लव्ह सोनिया'साठी सई ताम्हणकरनं आपलं वजन वाढवलं होतं.
मला नेहमी अशा भूमिका करायच्या होत्या, ज्या अभिनेत्री म्हणून मला सिद्ध करतील. केवळ ग्लॅमरस भूमिकाच मला आकर्षित करत नाहीत. तर त्या भूमिकेतलं नाट्य मला आकर्षित करतं. ग्लॅमरस आणि छान राहण्याचा-दिसण्याचा माझा आग्रह असतो. पण, ते केवळ पार्टी आणि प्रमोशनच्या कार्यक्रमांमध्ये. सिनेमात माझं लक्ष त्या भूमिकेला पूरक ठरेल असं दिसण्याकडे असतं.
- श्वेता त्रिपाठी, अभिनेत्री