सुरज कांबळे, कॉलेज क्लब रिपोर्टर
लालबाग-परळ भागात राहणारा कामगार वर्ग, त्यांचं जगणं, त्यांच्या व्यथा मांडणारं 'अधांतर'सारखं नाटक, 'लालबाग परळ' हा सिनेमा खूप गाजला. लालबाग परळमध्ये राहणारी गिरणी कामगारांची एक पिढी आता संपली अशी चर्चा असतानाच त्यांच्या पुढच्या पिढीची गोष्ट सांगणारं एक नवंकोरं प्रायोगिक नाटक रंगभूमीवर दाखल झालं आहे. आजच्या पिढीची गोष्ट सांगणाऱ्या या नाटकाचं नाव 'तोडी मिल फँटसी' असं असून, सुजय जाधव या तरुण लेखकानं नाटकाची गोष्ट लिहिली आहे. विनायक कोळवणकर या तरुण दिग्दर्शकानं नाटकाचं दिग्दर्शन केलंय.
भारतीय कला केंद्र आणि थिएटर फ्लेमिंगो यांच्याबरोबर देशी रिफनं हे मॉडर्न संगीत नाटक आणलं आहे. लालबाग परळच्या चाळींमध्ये राहणारी कुटुंबं, त्यांचं जगणं या नाटकातून समोर येतंय. मुंबईचे भूमीपुत्र म्हणवल्या जाणाऱ्यांना सोसाव्या लागणाऱ्या हालअपेष्टा, कामगारांच्या छाताडावर उभे राहिलेले टॉवर्स, त्याच्यामागे असलेलं राजकारण तसंच आयुष्यात घडलेली छोट्यातली छोटी गोष्ट संपूर्ण आयुष्यावर कसा परिणाम करू शकते यावर या नाटकात भाष्य करण्यात आलं आहे. 'तोडी मिल फँटसी'ची कथा ही कुणा एकाच्या आयुष्यात घडणारी नसून ती कोणत्याही तरुणाच्या आयुष्यात घडू शकते. या नाटकाचा प्रयोग नुकताच यशवंत नाट्यमंदिरमध्ये पार पडला. एका रेस्तराँमध्ये काम करणारा सफाई कामगार घंट्या पावशेच्या आयुष्यात आलेल्या एका मुलीमुळे त्याचं आयुष्य कसं बदलतं याची एक रंजक कथा विनोदी अंगानं यात मांडण्यात आली आहे. या नाटकातलं संगीत हे त्याचं वेगळेपण आहे. शुभंकर एकबोटे, जयदीप मराठे, कपिल रेडेकर, प्रमिती नरके आणि सुरज कोकरे हे कलाकार या नाटकात प्रमुख भूमिकेत दिसताहेत.
आम्ही स्वत: लालबाग-परळ भागातल्या चाळीत लहानाचे मोठे झालो. आम्हाला पडलेले प्रश्न आम्ही या नाटकाद्वारे मांडत आहोत. मुंबई ही श्रमिक कामगारांच्या जीवावर उभी राहिली आहे. मुंबईचं जे आजचं रुप आहे ते इथे राबलेल्या कामगारांमुळेच आहे. अशा वेळी कामगारांची पुढची पिढी काय करतेय याकडे कुणाचंच लक्ष नाही. कामगारांच्या नव्या पिढीची हीच व्यथा आम्ही मांडतो आहोत.
विनायक कोळवणकर, दिग्दर्शक (तोडी मिल फँटसी)