सर्वोत्कृष्ट लेखक
कलाकारांचा गौरव
'मटा सन्मान'चं मानांकन या वर्षी पुन्हा मिळाल्याचा आनंद आहे. सतत प्रायोगिक नाट्यक्षेत्रात कार्यरत असणाऱ्या कलाकारांचा हा गौरवच आहे. आम्ही नाटक करतो आणि त्याची दखल मटा घेत आलं आहे. याचं फार अप्रूप वाटत आणि समाधानही
राम दौंड, लेखक, (तुका म्हणे)
खंबीर आधार
'मटा सन्मान' म्हणजे आम्हा कलाकारांच्या पाठीशी असलेला खंबीर आधार म्हणता येईल. कला आणि कलाकार यांना समाजासमोर आणायचं काम 'मटा' गेली अनेक वर्ष करतोय. मानांकन मिळालं आहेच, आता उत्सुकता आहे ती विजेता कोण ठरेल त्याची.
प्रदीप वैद्य, लेखक-दिग्दर्शक (काजव्यांचा गाव)
सर्वोत्कृष्ट दिग्दर्शक
आनंद मोठा
'मटा सन्मान' सोहळ्यामध्ये एवढ्या मोठ्या दिग्दर्शकांच्या फळीत मला मानांकन मिळेल की नाही याबाबत मी साशंक होतो. मला ते मिळालं याचा आनंद शब्दांत मांडता येत नाही. 'मटा सन्मान'नं मला दिलेल्या मानांकनाबद्दल मी त्यांचे आभार मानतो.
अनिकेत पाटील, (एक दोन अडीच)
प्रोत्साहन महत्त्वाचं
'खगनिग्रह' या नाटकातली सर्व पात्रं पक्षी आहेत. या नाटकाच्या निमित्तानं मला पहिल्यांदाच 'मटा सन्मान'साठी मानांकन मिळालं याचा खूप आनंद आहे. माझं हे पहिलंच मानांकन आहे आणि तेसुद्धा प्रायोगिक नाटकासाठी, ज्यात मी एक वेगळाच प्रयोग केला आहे. नाट्यकर्मीना प्रोत्साहन देण्याचं महत्त्वाचं काम 'मटा सन्मान' करत असतो.
डॉ. अनिल बांदिवडेकर, (खगनिग्रह)
सर्वोत्कृष्ट अभिनेत्री
विशेष आनंद
'महाराष्ट्र टाइम्स'सारख्या जुन्या आणि मोठ्या वृत्तपत्रानं 'मटा सन्मान'साठी मानांकन दिलं. माझं काम जाणत्या परीक्षकांना मानांकन देण्यायोग्य वाटलं या गोष्टीचा मला फार आनंद झाला. आमच्या 'काजव्यांचा गाव' या नाटकाला प्रायोगिक नाटकांसाठी असलेल्या प्रत्येक विभागासाठी मानांकन मिळालंय याचा विशेष आनंद होतोय.
रुपाली भावे, (काजव्यांचा गाव)
पहिलंवहिलं मानांकन, तेसुद्धा 'मटा'सारख्या प्रतिष्ठेच्या व्यासपीठावर मिळाल्यामुळे मी खूप आनंदित आहे. काहीसं अनपेक्षित असं हे मानांकन दिल्याबद्दल मटा आणि मान्यवर परीक्षकांचे खूप आभार.
अबोली नाईक (चि. श्री. व सौ साखरे)
इतरांपेक्षा वेगळा
माझं हे पहिलंच मानांकन आहे, त्यामुळे फार छान वाटतं आहे. प्रायोगिक रंगभूमीवर कलाकार नेमके काय करत असतात त्याची दखल 'मटा सन्मान'सारखा महत्त्वाचा मंच घेत असतो. इतर गौरव सोहळ्यांहून खूप वेगळा असा 'मटा सन्मान' सोहळा आहे.
पूनम कुलकर्णी (नवा सूर्य)
सर्वोत्कृष्ट अभिनेता
मानांकनाचा आनंद
'मटा सन्मान'चं मानांकन मिळाल्याचा खूप आनंद होतोय. ज्या वृत्तपत्राशी माझं एक वाचक म्हणून नातं आहे, त्या वृत्तपत्राकडून मानांकन मिळाल्यामुळे खूप छान वाटतंय . 'काजव्यांचा गाव' हे नाटक करताना मी अभिनेता म्हणून अधिक समृद्ध झालो. नाटकाच्या तालमीदरम्यान कोकणात जाणं, त्या निमित्तानं केलेली इम्प्रोव्हायझेशन या गोष्टींचं चीज झालं.
आशिष वझे, (काजव्यांचा गाव)
दखल घेतली
'मटा सन्मान'चं मानांकन मिळणं ही फार अभिमानाची गोष्ट आहे माझ्यासाठी. आपण नाटक करतो ते आपले विचार लोकांपर्यंत पोहोचवण्यासाठी. 'मटा सन्मान'च्या परीक्षकांनी या नाटकाची दखल घेतली. आम्हाला दिलेल्या मानांकनासाठी मटाचे आभार.
सुयश झुंजूरके (दिल ही तो है)
संकलन - सूरज कांबळे