सैनिकांना मदतीचा हात

मुंबई टाइम्स टीम

अभिनेत्री ऋतुजा बागवेचं 'अनन्या' हे नाटक सध्या खूप गाजतंय. यातल्या तिच्या भूमिकेचं तर कौतुक होत आहेच. पण, आणखी एका गोष्टीमुळे ऋतुजा कौतुकास पात्र ठरली आहे. काही दिवसांपूर्वी नाटक पाहायला आलेल्या एका प्रेक्षकांना तिच्या उत्कृष्ट अभिनयासाठी एकावन्न हजार रुपयांचा चेक भेट म्हणून दिला होता. 'मुंटा'नं तेव्हा ती बातमी प्रसिद्ध केली होती. पण, एवढ्या पैशांचं आपण करायचं काय असा प्रश्न तिला पडला होता. तिला ही रक्कम समाजकार्यासाठी खर्च करण्याची इच्छा होती. तिनं यातली निम्मी रक्कम देशाच्या सैनिकांसाठी दिली आहे. जे सैनिक आपल्या देशाचं रक्षण करताना गंभीर जखमी होऊन दिव्यांग होतात, अशा सैनिकांना सहाय्य करणाऱ्या एका संस्थेला तिनं ही रक्कम देऊ केली. अलीकडेच लालबागचा राजा सार्वजनिक गणेशोत्सव मंडळानं आयोजित केलेल्या एका कार्यक्रमामध्ये तिनं 'पॅराप्लेजिक रिहॅबिलिएशन सेंटर, खडकी' या संस्थेचे कर्नल पत्की यांच्याकडे २५ हजार पाचशे रुपये ही रक्कम सुपूर्द केली.