मुंबई टाइम्स टीम
'हे असं काम करणं खूप कठीण आहे. असं विलक्षण नाटक तुम्ही आज करत आहात, याचा खूप आनंद वाटतो. तुमच्या कामाचं कौतुक करावं तेवढं थोडं आहे. मी माझ्या मित्रांना घेऊन पुन्हा एकदा हे नाटक पाहायला नक्की येईन', हे उद्गार आहेत ज्येष्ठ अभिनेते नसिरुद्दीन शहा यांचे. अलीकडेच त्यांनी पुण्यामध्ये 'संगीत देवबाभळी'चा प्रयोग पाहिला. त्यानंतर त्यांनी या नाटकाचं, कलाकारांचं भरभरुन कौतुक केलं. ज्येष्ठ अभिनेत्री ज्योती सुभाष नसिरुद्दीन यांना हे नाटक पाहण्यासाठी खास घेऊन आल्या होत्या. अभिनय क्षेत्रातला विठ्ठल म्हणता येईल अशा व्यक्तिमत्त्वाकडून झालेल्या कौतुकामुळे नाटकाची टीम भारावली होती.
बॉलिवूडच्या झगमगाटी दुनियेत वावरत असतानाही नसिरुद्दीन यांची नाळ रंगभूमीशी जोडलेली आहे. उत्तक कलाकृती पाहण्यासाठी उत्सुक असलेल्या नसिर यांनी 'संगीत देवबाभळी'च्या प्रयोगाला खास हजेरी लावली. नाटकात मुख्य भूमिका करत असलेल्या मानसी जोशी आणि शुभांगी सदावर्ते यांच्या अभिनयाचं नसिरुद्दीन यांनी कौतुक केलं. 'मराठी जरी मला पूर्णपणे समजत नसलं, तरी त्यांच्या भावना, ती आर्तता माझ्यापर्यंत पोहोचत होती', असे ते म्हणाले. याबाबत शुभांगीनं 'मुंटा'शी बोलताना सांगितलं की, 'ज्येष्ठ अभिनेत्री ज्योती सुभाष नसिरुद्दीन शहा यांना प्रयोग पाहण्यासाठी घेऊन आल्या होत्या. त्यांना समोर पाहून आम्हाला सुखद धक्काच बसला. काळ्या झब्ब्यामध्ये आलेल्या नसिर यांना पाहून माझ्यासमोर जणू सावळा विठ्ठलच उभा आहे की काय असं वाटत होतं. इतक्या बड्या कलाकारानं केलेल्या कौतुकामुळे आता आमची जबाबदारी अधिक वाढली आहे.'