सोशल मीडियावर पडदा उघडला

अनेक वर्ष फक्त पेपरमधल्या जाहिरातींवर अवलंबून राहणारी मराठी नाटकं आता ही चौकट मोडून बाहेर पडली आहेत. नाटकांच्या प्रमोशनसाठीही वेगवेगळ्या युक्त्या वापरल्या जात असून, त्यात सोशल मीडियाचाही खूप वापर केला जातोय.

रंगभूमीवर वेगवेगळे प्रयोग करुन पाहणारी मराठी नाटकं सोशल मीडियावरही तेवढीच अॅक्टिव्ह झाली आहेत. तरुणाईचं आवडतं माध्यम असलेल्या सोशल मीडियावर नाटकांचं जोरदार प्रमोशन केलं जात आहे. प्रत्येक नाटकाचं आता फेसबुक पेज असून काहीजण ट्विटरवरही आहेत. इन्स्टाग्रामवरही काही नाटकं अॅक्टिव्ह असल्याचं दिसून येत आहे.

पूर्वी नाटकांबद्दल माहिती देण्यासाठी फक्त पेपरमधल्या जाहिरातींचा कल्पकतेनं वापर केला जायचा. पण काळानुसार हे सोशल मीडियाचाही तितकाच प्रभावी वापर करण्याकडे नाटकवाल्यांचा कल आहे. नाटक रंगभूमीवर येण्यापूर्वी फोटोज टाकून त्याविषयी उत्सुकता निर्माण केली जाते. प्रतिक्रियांचे व्हिडीओज शेअर केले जातात. मॅनेक्वीन चॅलेंज, डबस्मॅश अशा वेगवेगळ्या ट्रेंडमध्येही नाटकाच्या टीम सहभागी होत असतात.

'दोन स्पेशल'पासून मी नाटकाची सोशल मीडियावर प्रसिद्धी करायला सुरुवात केली. आज जवळपास सोळा नाटकं माझ्याकडे आहेत. सगळ्या वयोगटातले लोकं आता फेसबुक वापरतात. हल्ली नाटकाचं फोटोशूट केलं जातं पैकी एक ते दोनच फोटोज जाहिरातीत येतात. त्यामुळे उरलेले फोटो सोशल मीडियासाठी आम्ही वापरतो. चॅलेंजेस, व्हिडीओज, प्रतिक्रिया शेअर करून त्यात लोकांना टॅग केलं जातं. यामुळे नाटक जास्तीत जास्त प्रेक्षकांपर्यंत पोहोचायला मदत होते.

- वैभव शेटकर, सोशल मीडिया मॅनेजर

प्रमोशनच्या युक्त्या

'अमर फोटो स्टुडिओ' या नाटकाच्या प्रसिद्धीसाठी कलाकारांनी पासपोर्ट फोटोचं चॅलेंज दिलं होतं. नाटकाबद्दल काहीही जाहीर करण्यापूर्वी आपापल्या मित्रांना टॅग करून साधारण आठवडाभर हे चॅलेंज देणं सुरु होतं. यात अमर फोटो स्टुडिओचा हॅशटॅग वापरण्यात आला असल्याने नाटकाबद्दल आधीच हवा झाली होती.

'स्ट्रॉबेरी' नाटकासाठी त्यातील मुख्य कलाकार सुयश टिळक आणि सुरुची आडारकर यांचं तोंडात स्ट्रॉबेरी असलेलं एक पोस्टर होतं. प्रेमात असलेल्या जोडीदारांनी आपला असा फोटो काढून सोशल मीडियावर शेअर करण्याची विनंती नेटिझन्सना केली होती.

'आईचं पात्र हरवलं' या नाटकाच्या प्रसिद्धीसाठी अभिनेत्री श्वेता पेंडसे हिने पत्रलेखनाचं चॅलेंज फेसबुकवर दिलं होतं. आपल्याला हवं त्या व्यक्तीला पत्र लिहून त्यात आईचं पत्र हरवलं हा हॅशटॅग वापरायचा होता. या चॅलेंजला उत्तम प्रतिसाद मिळाला होता. 'एक शून्य तीन' या नाटकाने प्रमोशनसाठी मोशन पोस्टरचा वापर केला होता. तर ‘गेला उडत’ या नाटकाची टीमही लाइव्ह चॅटद्वारे प्रेक्षकांशी संवाद साधत असते.

अमर फोटो स्टुडिओ

फेसबुक - ८४३१

दोन स्पेशल

फेसबुक - ८६४४

ट्विटर - १४५७

गेला उडत

फेसबुक - ३८४२

कोडमंत्र

फेसबुक - २७०६

वाडा चिरेबंदी

फेसबुक - २७४४

डोन्ट वरी बी हॅपी

फेसबुक - १०,२४६

ट्विटर - १५३७

गोष्ट तशी गमतीची

फेसबुक - १४, २७९