एकांकिका ते बॉक्सऑफिस

मुंबई टाइम्स टीम

सळसळत्या उत्साहानं कॉलेजिअन्स सादर करत असलेल्या एकांकिकांना सध्या चांगले दिवस आहेत. एकांकिकांचं नाटक होणं किंवा त्यावर चित्रपट तयार होणं अशी अनेक उदाहरणं सध्या पाहायला मिळताहेत. या यादीत आता 'परी हूं मैं' या सिनेमाचं नाव येतंय. हा चित्रपट २००९ साली रुपारेल कॉलेजच्या नाट्यविभागानं सादर केलेल्या 'वेगे वेगे धावू' या एकांकिकेवर आधारित आहे.

एकांकिकेचं नाटक होणं किंवा त्याचा सिनेमा होणं, हे मराठी मनोरंजन विश्वासाठी नवं नाही. सध्या व्यावसायिक रंगभूमीवर सुरू असलेली अनेक नाटकं ही कॉलेज स्तरावर एकांकिका स्पर्धांमध्ये सादर झालेल्या एकांकिकांवर आधारित आहेत. गेल्या वर्षी प्रदर्शित झालेला 'भेटली तू पुन्हा' हा सिनेमा देखील 'आयुष्य एक होताना' या एकांकिकेवर आधारित होता. इरावती कर्णिकलिखित आणि अद्वैत दादरकरदिग्दर्शित 'वेगे वेगे...' या एकांकिकेनं त्यावेळी अनेक पारितोषिकं पटकावली होती. या एकांकिकेवरुन 'मिथक' या नाट्यसंस्थेनं पुढे दीर्घांकाची निर्मिती केली होती. विशेष म्हणजे, एकांकिका आणि दीर्घांकामध्ये दिग्दर्शन करणारा रोहित शीलवंत या तरुणानंच सिनेमाचं दिग्दर्शन केलं आहे. रोहितचा दिग्दर्शक म्हणून हा पहिलाच सिनेमा आहे. यापूर्वी त्यानं दिग्दर्शक रवी जाधव, संजय जाधव यांच्याकडे सहाय्यक दिग्दर्शक म्हणून काम केलं आहे. 'परी हूं मैं' असं या सिनेमाचं नाव असून, ग्लॅमर, प्रसिद्धीच्या झगमगत्या दुनियेत अडकलेली बालकलाकार आणि तिच्या कुटुंबाची गोष्ट यात दाखवण्यात आली आहे. नंदू माधव, देविका दफ्तरदार, श्रुती निगडे यांच्या या सिनेमात प्रमुख भूमिका आहेत.

एकांकिका चित्रपट

बीपी - बालक पालक

बंध नायलॉनचे - बंध नायलॉनचे

आयुष्य एक होताना - भेटली तू पुन्हा