kalpeshraj.kubal@timesgroup.com
@KalpeshrajMT
मराठी व्यावसायिक रंगभूमी आणि गुजराती रंगभूमी यांच्यात एक घट्ट नातं आहे. या दोन्ही रंगभूमींमध्ये संहितांचं आदानप्रदान सुरू आहे. गुजरातीमधली आणखी एक संहिता 'वन्स मोअर' या नाटकातून मराठीत येतेय. कॉमेडीचा बादशहा भरत जाधव यात मुख्य भूमिका करत असून, त्याच्यासोबत आहे ऋजुता देशमुख. ही जोडी पहिल्यांदाच रंगभूमीवर दिसणार आहे. गुजराती संहितेचं मराठीत नाट्यरूपांतर निपुण धर्माधिकारीनं केलं असून, नाटकाच्या दिग्दर्शनाची जबाबदारी देखील त्यांनीच सांभाळली आहे.
मराठी नाटकं गुजरातीत तर गुजराती नाटकं मराठीत सादर होण्याची अनेक उदाहरणं रंगभूमीवर आहे. यात 'कोडमंत्र', 'आई तुला कुठे ठेवू', 'वेलकम जिंदगी' यासारख्या नाटकांची नावं यात घेता येतील. या यादीत 'वन्स मोअर' या नाटकाचं नाव येतंय. नाटकाची मूळ गुजराती संहिता ही लेखिका स्नेहा देसाई यांची आहे. सध्या भरतचं 'वेलकम जिंदगी' हे नाटक जोरात सुरू आहे. 'वेलकम जिंदगी'ची मूळ संहिता देखील गुजराती होती. त्यामुळे भरतनं पुन्हा एकदा आपल्या नाटकासाठी गुजराती संहितेचीच निवड केल्याच दिसतंय. याविषयी भरत म्हणाला, की 'मराठी-गुजराती संहितांची देवाण-घेवाण आपल्या रंगभूमीला नवी नाही. रंगभूमीच्या विस्ताराचं हे प्रतिक आहे. विषयांचं आदानप्रदान यानिमित्तानं होत असतं. नाटकाच्या भाषेपेक्षा संहितेचा विषय आणि बाज माझ्यासाठी महत्त्वाचा आहे. 'वन्स मोअर'ची मूळ संकल्पना मला अधिक भावली. नाटकाचा विषय जर सर्वव्यापी असेल तर त्याला भाषेचं बंधन राहत नाही.' सध्या नाटकाच्या जोरदार तालमी सुरू असून लवकरच नाटक प्रेक्षकांच्या भेटीला येणार असल्याचं कळतंय. नाटकाची निर्मिती भरतचीच आहे.
'हम दो हमारा एक'चा नारा देत लोकसंख्या नियंत्रण धोरणाचा फतवा सरकारकडून निघतो. या फतव्यामुळे उडणारी तारांबळ या नाटकात दिसेल. अभिनेता-दिग्दर्शक राजन ताम्हाणे यांची देखील नाटकात भूमिका आहे.