'भीमा...'चा वेगळा प्रयोग

वेगळे प्रयोग करू पाहणारे अनेक तरुण रंगकर्मी आज प्रायोगिक रंगभूमीवर कार्यरत आहेत. प्रथमेश पवार हा अशाच तरुण रंगकर्मींपैकी एक. ‘भीमा तुझी मुलं नापास का होतात’ हा वेगळा नाट्यप्रयोग घेऊन तो आला आहे. एफटीआयच्या आर्ट फेस्टिव्हलला शुभारंभ झालेल्या या एकपात्री प्रयोगाचे अद्याप दोन प्रयोग झाले आहेत. तिसरा प्रयोग येत्या २ जूनला रवींद्र नाट्यमंदिर मिनीट थिएटरला रात्री ८ वाजता होतोय.

प्रायोगिक रंगभूमीवर नवनवे प्रयोग करण्याच्या हौसेपायी प्रथमेश आणि दीपेश मोरे यांनी ‘आवर्जून एंटरटेन्मेंट’ ही संस्था स्थापन केली. या संस्थेत येणारी नाट्यप्रेमी मंडळी एकत्र येऊन दर्जेदार साहित्य, नाटकांचं वाचन, अभिवाचन करतात. या संस्थेला नंतर आणखी अनेक जण येऊन मिळाले. त्यातून एकदा सुप्रसिद्ध लेखक संजय पवार यांचा एक लेख त्यांच्या वाचनात आला. त्यामुळे ते खूप प्रभावित झाले. त्यातून एक नाट्यप्रयोग करायचं ठरवलं. हा प्रयोग सादर करण्यासाठी काही सेलिब्रिटींकडे त्यांनी विचारणा केली होती. पण त्यांनी ते नाकारलं. अखेर, या लेखावर आधारित सुमारे अर्ध्या तासाचा हा एकपात्री प्रयोग आता प्रथमेशच करतो आहे. त्यानंच याचं दिग्दर्शन करून तो स्वतःच ते सादर करतो. डॉ. बाबासाहेब आंबेडकरांचा अनुयायी असलेली व्यक्तिरेखा तो साकारतो.

शुभारंभाच्या प्रयोगानंतर बोरिवलीतल्या प्रबोधनकार ठाकरे नाट्यगृहातल्या मिनी थिएटरमध्ये याचा प्रयोग झाला. दोन्ही प्रयोगांना खूप चांगला प्रतिसाद मिळाल्याचं तो सांगतो. ‘खरं तर या नाटकाचं शीर्षक वाचूनच सगळ्यांच्या भुवया उंचावतात. एका अस्वस्थ मनाचा संवाद आहे. अतुल पेठे यांच्यासारख्या ज्येष्ठ रंगकर्मींकडून हे करण्याची प्रेरणा मिळते’, असं प्रथमेश सांगतो. त्यानं साठ्ये कॉलेजमधून आर्ट्‍समध्ये पदवी घेतली आहे. इतर कामांमधून पैसे उभे करून या प्रयोगासाठी पैसे उभे करायचं त्यांनी ठरवलं आहे.