हात गळ्यात, तरी प्रयोग जोरात!

लष्करी जीवनातील कडक शिस्तीचा परिचय देणाऱ्या 'कोडमंत्र' या नाटकात अतुल महाजन एका सैन्य अधिकाऱ्याची भूमिका बजावत आहेत. संहितेतील हीच शिस्त त्यांच्या प्रत्यक्ष जीवनातही असल्याचं समोर आलंय. हाताला गंभीर दुखापत असतानाही हात गळ्यात घेऊन प्रयोग करत आहेत. काय झाला होता हा प्रकार जाणून घ्या...
कल्पेशराज कुबल, कॉलेज क्लब रिपोर्टर
muntainbox@gmail.com
गेले तीन आठवडे अभिनेता अतुल महाजननं मुंबई-ठाण्यात असे 'कोडमंत्र'चे एकूण १४ प्रयोग केलेत. हाताला गंभीर दुखापत असताना देखील त्यांनी नाटकाचे प्रयोग करायची तयारी दर्शवली आहे. पुढे अजून पंधरा दिवस ते असेच गळ्यात हात घेऊन प्रयोग करताना दिसतील. हाताची दुखापत पूर्णपणे बरी झालेली नसल्यामुळे डॉक्टरांनी अतुलला प्लास्टर ठेवायला सांगितलंय.
काही दिवसांपूर्वीची दुचाकीवरून जाताना अतुलचा अपघात झाला. यात त्याला उजव्या हाताच्या दंडाला गंभीर दुखापतीसह तीन हेअरलाइन फ्रॅक्चरही झाली. मात्र अपघाताच्या बरोबर दुसऱ्या दिवसापासून त्याच्या 'कोडमंत्र' नाटकाचे पूर्वनियोजित प्रयोग लागले होते. अशावेळी सहनिर्माते दिनू पेडणेकर यांनी ते रद्द करण्याचं ठरवलं. मात्र 'शो मस्ट गो ऑन' म्हणत अतुलनं या अवस्थेतच नाटकाचे प्रयोग करण्याचा निर्णय घेतला. प्रयोगावेळी हाताला प्लास्टर असून देखील वेदनेचा लवलेश त्यांच्या चेहऱ्यावर कुठंही जाणवत नाही. अलीकडे हे नाटक बघणार्यांना लष्करी अधिकाऱ्याला(अतुल) झालेली दुखापत नाटकाचाच भाग असल्याचं जाणवतं. अर्थात नाटकाच्या दर प्रयोगापूर्वी घोषणेत नाट्यरसिकांची याबाबत दिलगिरी व्यक्त केली जाते. द्विशतकी प्रयोगाला उपस्थित असलेल्या दिग्दर्शक आशुतोष गोवारीकर, राजेश मापुस्कर यांसह सर्व नाट्यरसिकांकडून अतुल यांच्या जिद्दीचं कौतुक झालं.
तिसऱ्या घंटेनंतर दुखणं विसरलो
अपघाताच्या दुसऱ्या दिवशी आपल्यामुळे प्रयोग फसणार तर नाही ना अशी भीती वजा दडपण होतं. परंतु तिसऱ्या घंटेनंतर मी माझं दुखणं विसरून गेलो. नाटकातील सर्व सहकलाकार माझी काळजी घेतात. नाट्यरसिकांकडून मिळणारी कौतुकाची थाप ऊर्जा देते.
- अतुल महाजन