रडण्याचा आवाज येऊ नये म्हणून तिने बाळाच्या तोंडात पदर कोंबला आणि... सुकन्या मोनेंनी सांगितला तो प्रसंग

मुंबई- मराठी सिनेसृष्टीतील लोकप्रिय अभिनेत्री सुकन्या मोने यांनी त्यांच्या अभिनयाने प्रेक्षकांची मनं जिंकली. त्यांनी आपल्या कारकिर्दीत अनेक वेगवेगळ्या भूमिका केल्या. अभिनयसोबतच सुकन्या यांनी त्यांच्या नृत्याने प्रेक्षकांना भुरळ घातली. त्यानी अनेक मालिका, चित्रपट आई नाटकात काम केलं. त्या शेवटच्या 'बाईपण भारी देवा' या चित्रपटात झळकल्या. नुकत्याच दिलेल्या एका मुलाखतीत त्यांनी त्यांचा अभिनयातील खासकरून नाटकातील अनुभव सांगितला. नाटकादरम्यान घडलेले किस्से त्यांनी प्रेक्षकांना सांगितले आहेत.

मुलाखतीत बोलताना सुकन्या म्हणाल्या, 'नाटक करताना खूप घोळ होतात. प्रसंगी सगळं सावरून घ्यावं लागतं. प्रेक्षकांना कळू नये असं वागावं लागतं. आमच्या वेळेलाही असे खूप घोळ झालेत. म्हणजे मी कुसुम मनोहर लेले करतानादेखील खूप तारांबळ झालीये. हे नाटक आम्ही खूप ठिकाणी केलं. इथे गिरगावात देखील आम्ही नाटक केलंय. गिरगावातल्या दोन चाळीतल्या मध्ये आम्ही प्रयोग केला होता. त्यामुळे तिथे तर खूप छोटीशी जागा होती. तिथेच मी बसत होते, झोपत होते. कुठल्याही परिस्थितीत आपल्याला प्रयोग करावा लागतो. आणि कुसुम मनोहर लेलेचा प्रयोग होता आमचा रत्नागिरीला मी तिथे असं म्हणत असते की मला माझं बाळ द्या माझं बाळ द्या. एका पॉईंटला एक मूल तिथे रडायला लागलं. ओपन थिएटर होतं आणि आम्हाला चालू नाटकात जाणवलं की ते मूल आवाज दाबल्यासारखं रडतंय. आम्ही प्रयोग ताबडतोब थांबवला.'


पुढे सुकन्या म्हणाल्या, 'तिथे राहून आमच्या लक्षात आलं की त्या आईने मूल रडू नये आणि त्याचा आवाज येऊ नये. प्रयोग चालू राहावा यासाठी तिने त्या मुलाच्या तोंडात पदर कोंबला होता. आम्ही ते पाहिलं आणि त्यांना सांगितलं की तुम्ही असं करू नका. आम्ही थांबतो थोडावेळ. तुम्ही बाळाला शांत करा. असेही काही किस्से घडत असतात.'