चेटकिणीसाठी बॅकस्टेजवाल्यांची पळापळ

कल्पेशराज कुबल

'अलबत्या गलबत्या'चे पाच प्रयोग स्वातंत्र्यदिनी दणक्यात पार पडले. सलग पाच प्रयोगांत रंगभूमीवर चेटकिणीची जादूनं प्रेक्षकांवर भुरळ पाडली. प्रमुख कलाकारांबरोबरच त्यामागे मेहनत होती बॅकस्टेजवाल्या कलाकारांची...

कोणत्याही नाटकामध्ये कलाकारांबरोबरच महत्त्वाचे असतात ते बॅकस्टेजचे कलाकार. सलग पाच प्रयोगांत 'अलबत्या गलबत्या'मधल्या चेटकिणीच्या करामती दाखवण्यासाठी नाटकातल्या बॅकस्टेजच्या कलाकारांनीही खूप मेहनत घेतली. त्यात रंगमंच कामगार, मेकअपमन, साऊंट-लाइट ऑपरेटर अशा सर्वांचाच समावेश होता. प्रमुख भूमिका निभावणारे वैभव मांगले, इतर कलाकार यांच्या जिद्दीबरोबरच या बॅकस्टेज कलाकारांचीही मेहनत वाखाणण्याजोगी होती. पाचही प्रयोग संपल्यानंतर वैभव मांगले यांनी प्रेक्षकांना तसंच नाटकाच्या संपूर्ण टीमला वाकून नमस्कार केला.

एका दिवसात, एका नाट्यगृहात, एका बालनाट्याचे पाच प्रयोग करण्याचा बेत 'अद्वैत थिएटर्स'नं आखला. कलाकारांबरोबरच कस्टेजचा प्रत्येक कलाकार नाटकाचे हे ऐतिहासिक पाच प्रयोग यशस्वी पार पाडण्यच्या कामात गुंतला. कल्पेश बाविस्कर, नरेंद्र आंगणे, संजय झाजे, विक्रांत दळवी, सुहास चांदुरकर, राजा पेडणेकर, दीपक परब, सुमित सुर्वे इत्यादी पंचवीस जणांच्या टीमच्या खांद्यांवर नाटकाच्या प्रयोगाची धुरा होती. नेपथ्याच्या सेटिंगपासून प्रयोगातल्या अनेक गोष्टींची जबाबदारी त्यांच्यावर होती. प्रयोगाच्या आदल्या रात्रीपासून त्यांनी शिवाजी मंदिर नाट्यगृहात ठाण मांडलं होतं. नाटकाचा टेम्पो वेळेत पोहोचण्यापासून ते प्रत्येक प्रयोगाला नेपथ्य व्यवस्थापन करण्यासाठी ते सलग काम करत होते. नाटकातील एखादी प्रॉपर्टी वेळेत कलाकाराच्या हाती मिळावी यासाठी वैभव, अभय, चंदन हे प्रॉपर्टीवाले तत्पर होते.

सतीश खवतोडे आणि शिवा कुंभार यांनी कपडेपट सांभाळला. तर नाट्यमय अवकाश तयार करण्यासाठी लाइटवाला नामदेव, सुरज आणि साऊंडवाला रुपेश दुदम डोळ्यात तेल घालून ऑपरेटिंग सिस्टिम हाताळत होते. वैभव मांगले आणि दिग्दर्शक चिन्मय मांडेलकर यांनी देखील बॅकस्टेजवाल्यांच्या कामाचं कौतुक केलं. कलाकार आणि पडद्यामागचे कलाकार यांच्या मेहनतीवर व्यवस्थापक गोट्या सावंत लक्ष ठेवून होते. येत्या २६ जानेवारीला 'अलबत्या गलबत्या'चे एका दिवसात सहा प्रयोग करण्याचा त्यांचा मानसही त्यांनी 'मुंटा'कडे व्यक्त केला आहे. या विक्रमाची नोंद लिम्का आणि गिनीज बुक ऑफ वर्ल्ड रेकॉर्डमध्ये होण्यासाठी प्रयत्न सुरू झाले आहेत, असं निर्माते राहुल भंडारे यांनी सांगितलं.

चहा-वड्यांवर ताव...

सकाळी सात वाजल्यापासून ते रात्री दहा वाजेपर्यंत कलाकरांपासून नाटकाला आलेल्या साधारण साडेचार हजारांहून अधिक प्रेक्षकांना ताजंतवान ठेवण्यासाठी शिवाजी मंदिरच्या कँटिनचे बाळू चहावाला आणि शांताराम महाडिक वडेवाले तत्पर होते.