मुंबई टाइम्स टीम
जानेवारी २०२० पासून रवींद्र नाट्यमंदिरात प्रायोगिक रंगभूमीसाठी रंगमंच खुला होईल अशी घोषणा निवडणुकीआधी झाली. त्यानुसार कामही सुरू झालं. पण, कामाची प्रगती पाहता खरोखरच हा रंगमंच जानेवारीपासून उपलब्ध होईल का, असा प्रश्न रंगकर्मींना पडला आहे.
विधानसभा निवडणुकांपूर्वी रवींद्र नाट्यमंदिरामध्ये प्रायोगिक रंगभूमीचं काम धडाक्यात सुरू झालं. जानेवारी २०२० पासून हा रंगमंच प्रायोगिक रंगभूमीसाठी खुला होईल अशी घोषणा तत्कालीन सांस्कृतिक कार्यमंत्री विनोद तावडे यांनी केली होती. मात्र, ‘महाराष्ट्र टाइम्स’च्या प्रतिनिधीनं बुधवारी प्रायोगिक रंगमंचाच्या ठिकाणी भेट दिली असता रंगभूमीच्या कामात फारशी प्रगती न झाल्याचं दिसून आलं. ऑगस्टच्या स्थितीत आणि नोव्हेंबरच्या स्थितीत फार फरक नसल्याचं आढळून आलं. त्यामुळे हे काम पूर्ण होऊन खरोखरच जानेवारीपासून हा रंगमंच प्रायोगिक रंगकर्मींना वापरायला मिळेल का, असा प्रश्न विचारला जातोय. पण, पन्नास टक्क्यांहून अधिक काम पूर्ण झाल्याचा दावा पु. ल. देशपांडे महाराष्ट्र कला अकादमीकडून केला जातोय.
सद्यस्थितीत या नाट्यगृहामध्ये खुर्च्यांची सोय नाही, की रंगमंच बांधलेला नाही. उद्घाटनासाठी करण्यात आलेल्या तयारीपलीकडे रंगमंचाचं काम पुढे सरकलेलं दिसत नाही. हा प्रकल्प सन २००९ पासून रखडलेला होता. मुंबईतील प्रायोगिक चळवळीसाठी विद्यार्थ्यांना आणि रंगकर्मींना व्यासपीठ मिळणं गरजेचं आहे, अशी भावना रंगकर्मींकडून व्यक्त होत होती. दिवंगत ज्येष्ठ रंगकर्मी अरुण काकडे यांनी या प्रायोगिक रंगमंचासाठी वारंवार पाठपुरावा केला होता. उद्घाटन कार्यक्रमालाही त्यांची उपस्थिती होती. २३ ऑगस्टला उद्घाटन झाल्यानंतर आता २३ नोव्हेंबरला तीन महिने पूर्ण होत आहेत. काकडेकाकांच्या निधनानंतर त्यांना श्रद्धांजली म्हणून रंगमंचाचं काम दिलेल्या आश्वासनानुसार वेळेत पूर्ण केलं जाईल अशी आशा रंगकर्मींना वाटत होती. मात्र बुधवारी या कामाच्या ठिकाणी एकही व्यक्ती ‘मटा’ प्रतिनिधीला आढळली नाही. या परिसरात काम सुरू असल्याच्या कोणत्याही खुणा आढळून आल्या नाहीत. त्यामुळे निवडणुकांपूर्वी केवळ उद्घाटन उरकून घ्यावं म्हणून या कामाला सुरुवात करण्यात आलं की काय, असा प्रश्न रंगकर्मी विचारत आहेत.
या प्रायोगिक नाट्यगृहामध्ये ३९१ आसने, डिजिटल सिनेमा प्रोजेक्टर, आधुनिक तंत्रज्ञानयुक्त प्रकाशव्यवस्था, ध्वनी व्यवस्था, दर्जेदार ध्वनीशोषक (अॅकॉस्टिक्स) प्रणाली, सुसज्ज मेकअप रुम, भव्य स्टेज आदी व्यवस्था असतील, असं तेव्हा सांगण्यात आलं होतं. मात्र नोव्हेंबर महिना संपत आला तरी याची कुठलीही तयारी दिसलेली नाही.
यासंदर्भात पु. ल. देशपांडे महाराष्ट्र कला अकादमीचे प्रकल्प संचालक बिभीषण चवरे यांच्याशी संपर्क साधला असता त्यांनी हे काम दोन टप्प्यांत सुरू असल्याचं स्पष्ट केलं. ‘प्रेक्षागृहाचं काम झालं आहे. नाट्यगृहाचं काम ५० टक्क्यांपेक्षा अधिक झालं आहे’ असा दावा त्यांनी केला. ‘स्वच्छतागृहांचं काम झालं असून, डिसेंबरमध्ये खुर्च्यांचं काम होईल. या कामासाठी कंत्राटदार नेमण्यात आले आहेत. तसंच यासाठी तज्ज्ञांची समितीही नेमली असून त्यांची यावर देखरेख आहे. फेब्रुवारी महिन्यात काम पूर्ण करण्याचं उद्दीष्ट ठरवण्यात आलं आहे’, अशी माहिती त्यांनी ‘मटा’ला दिली.
जानेवारी २०२० पासून रवींद्र नाट्यमंदिरात प्रायोगिक रंगभूमीसाठी रंगमंच खुला होईल अशी घोषणा निवडणुकीआधी झाली. त्यानुसार कामही सुरू झालं. पण, कामाची प्रगती पाहता खरोखरच हा रंगमंच जानेवारीपासून उपलब्ध होईल का, असा प्रश्न रंगकर्मींना पडला आहे.
विधानसभा निवडणुकांपूर्वी रवींद्र नाट्यमंदिरामध्ये प्रायोगिक रंगभूमीचं काम धडाक्यात सुरू झालं. जानेवारी २०२० पासून हा रंगमंच प्रायोगिक रंगभूमीसाठी खुला होईल अशी घोषणा तत्कालीन सांस्कृतिक कार्यमंत्री विनोद तावडे यांनी केली होती. मात्र, ‘महाराष्ट्र टाइम्स’च्या प्रतिनिधीनं बुधवारी प्रायोगिक रंगमंचाच्या ठिकाणी भेट दिली असता रंगभूमीच्या कामात फारशी प्रगती न झाल्याचं दिसून आलं. ऑगस्टच्या स्थितीत आणि नोव्हेंबरच्या स्थितीत फार फरक नसल्याचं आढळून आलं. त्यामुळे हे काम पूर्ण होऊन खरोखरच जानेवारीपासून हा रंगमंच प्रायोगिक रंगकर्मींना वापरायला मिळेल का, असा प्रश्न विचारला जातोय. पण, पन्नास टक्क्यांहून अधिक काम पूर्ण झाल्याचा दावा पु. ल. देशपांडे महाराष्ट्र कला अकादमीकडून केला जातोय.
सद्यस्थितीत या नाट्यगृहामध्ये खुर्च्यांची सोय नाही, की रंगमंच बांधलेला नाही. उद्घाटनासाठी करण्यात आलेल्या तयारीपलीकडे रंगमंचाचं काम पुढे सरकलेलं दिसत नाही. हा प्रकल्प सन २००९ पासून रखडलेला होता. मुंबईतील प्रायोगिक चळवळीसाठी विद्यार्थ्यांना आणि रंगकर्मींना व्यासपीठ मिळणं गरजेचं आहे, अशी भावना रंगकर्मींकडून व्यक्त होत होती. दिवंगत ज्येष्ठ रंगकर्मी अरुण काकडे यांनी या प्रायोगिक रंगमंचासाठी वारंवार पाठपुरावा केला होता. उद्घाटन कार्यक्रमालाही त्यांची उपस्थिती होती. २३ ऑगस्टला उद्घाटन झाल्यानंतर आता २३ नोव्हेंबरला तीन महिने पूर्ण होत आहेत. काकडेकाकांच्या निधनानंतर त्यांना श्रद्धांजली म्हणून रंगमंचाचं काम दिलेल्या आश्वासनानुसार वेळेत पूर्ण केलं जाईल अशी आशा रंगकर्मींना वाटत होती. मात्र बुधवारी या कामाच्या ठिकाणी एकही व्यक्ती ‘मटा’ प्रतिनिधीला आढळली नाही. या परिसरात काम सुरू असल्याच्या कोणत्याही खुणा आढळून आल्या नाहीत. त्यामुळे निवडणुकांपूर्वी केवळ उद्घाटन उरकून घ्यावं म्हणून या कामाला सुरुवात करण्यात आलं की काय, असा प्रश्न रंगकर्मी विचारत आहेत.
या प्रायोगिक नाट्यगृहामध्ये ३९१ आसने, डिजिटल सिनेमा प्रोजेक्टर, आधुनिक तंत्रज्ञानयुक्त प्रकाशव्यवस्था, ध्वनी व्यवस्था, दर्जेदार ध्वनीशोषक (अॅकॉस्टिक्स) प्रणाली, सुसज्ज मेकअप रुम, भव्य स्टेज आदी व्यवस्था असतील, असं तेव्हा सांगण्यात आलं होतं. मात्र नोव्हेंबर महिना संपत आला तरी याची कुठलीही तयारी दिसलेली नाही.
यासंदर्भात पु. ल. देशपांडे महाराष्ट्र कला अकादमीचे प्रकल्प संचालक बिभीषण चवरे यांच्याशी संपर्क साधला असता त्यांनी हे काम दोन टप्प्यांत सुरू असल्याचं स्पष्ट केलं. ‘प्रेक्षागृहाचं काम झालं आहे. नाट्यगृहाचं काम ५० टक्क्यांपेक्षा अधिक झालं आहे’ असा दावा त्यांनी केला. ‘स्वच्छतागृहांचं काम झालं असून, डिसेंबरमध्ये खुर्च्यांचं काम होईल. या कामासाठी कंत्राटदार नेमण्यात आले आहेत. तसंच यासाठी तज्ज्ञांची समितीही नेमली असून त्यांची यावर देखरेख आहे. फेब्रुवारी महिन्यात काम पूर्ण करण्याचं उद्दीष्ट ठरवण्यात आलं आहे’, अशी माहिती त्यांनी ‘मटा’ला दिली.