'उमराव जान म्युझिकल' हा एक आगळावेगळा कार्यक्रम लवकरच प्रेक्षकांच्या भेटीला येतोय. सुमारे ५० कलाकारांचा सहभाग असलेल्या या कार्यक्रमासाठी नृत्यदिग्दर्शनाचं आव्हान पेललं आहे पूजा पंत या मराठी तरुणीनं...
शब्दुली कुलकर्णी
'इन आंखों की मस्ती के...' या गाण्याचे शब्द ऐकताच आपल्या डोळ्यांसमोर 'उमराव जान' हा चित्रपट आणि त्या गाण्यावर अभिनेत्री रेखा यांच्या नृत्याच्या अदा आठवतात. या चित्रपटातलं प्रत्येक गाणं आजही प्रेक्षकांच्या ओठांवर आहे. ती गाणी घेऊन 'उमराव जान म्युझिकल' हा एक आगळावेगळा भव्य कार्यक्रम प्रेक्षकांसमोर येत आहे. उर्दू भाषेत सादर होणाऱ्या या कार्यक्रमात वीस गायक संगीत आणि नृत्य सादर करतील. या कार्यक्रमाचं नृत्यदिग्दर्शन पूजा पंत या मराठी मुलीनं केलं आहे. कार्यक्रमाचा पहिला प्रयोग येत्या ३ ऑगस्टला दिल्लीमध्ये रंगणार आहे.
'मुघल ए आझम' हा अशा स्वरुपाचा कार्यक्रम यापूर्वी सादर झाला आहे. दोन महिने ५० कलाकारांसह कसून सराव केल्यानंतर 'उमराव जान' हा म्युझिकल कार्यक्रम प्रेक्षकांच्या भेटीला येत आहे. १९८१ साली प्रदर्शित झालेल्या या चित्रपटातली गाणी आणि त्याची संहिता तयार करण्यासाठी 'उमराव जान' या पुस्तकाची मदत घेण्यात आली आहे. या संपूर्ण कार्यक्रमाचं नृत्यदिग्दर्शन पूजा पंतनं केलं आहे. वयाच्या चौथ्या वर्षापासून पूजानं कथकचं प्रशिक्षण घ्यायला सुरुवात केली. तब्बल १५ वर्षं राजश्री शिर्के यांच्याकडे कथकचं प्रशिक्षण घेतल्यानंतर तिनं लखनऊला जाऊन पंडित अर्जुन मिश्रा यांच्याकडे पुढचं प्रशिक्षण घेतलं. काळाघोडा, एनसीपीए इथे अनेक कार्यक्रमांच्या माध्यमातून तिनं कथकचं सादरीकरण केलं आहे. तिच्या 'बियाँड बॉलिवूड' या कार्यक्रमाचे प्रयोग आंतरराष्ट्रीय स्तरावर झाले आहेत.
गायकांना कथक शिकवणं हे मोठं आव्हान होतं. तसंच ते गायक गाता-गाता नृत्य सादर करणार आहेत. त्यामुळे त्यानुसार कथकच्या स्टेप्स शिकवणं गरजेचं होतं. कार्यक्रमाच्या दिग्दर्शकानं तेवढी मोकळीक मला दिली. दोन महिने आम्ही जीव ओतून यासाठी सराव केला.
- पूजा पंत
कथकच्या माध्यमातून प्रयोग
पूजा कथकच्या माध्यमातून नानाविध विषय हाताळत असते. याची उदाहरणं म्हणजे प्ले स्टोअर, साऊंड ऑफ कुकिंग आणि स्टोरी ऑफ टीशर्ट. कँडी क्रश आणि सबवे सर्फर हे मोबाइल गेम्स आणि बुद्धिबळ, सापशिडी, सागरगोटे यासारखे खेळ त्यांनी कथकच्या माध्यमातून दाखवले. साऊंड ऑफ कुकिंगमध्ये अविनाश तिवारी या बिट बॉक्सरच्या मदतीनं आणि कथकच्या माध्यमातून दालखिचडीची पाककृती सादर केली. वस्त्रोद्योगामुळे पर्यावरणावर होणारे दुष्परिणाम तिनं कथकच्या माध्यमातून दाखवले आहेत.