‘वाडा…’, ‘मग्न…’, ‘युगान्त’वर वर्षअखेर पडदा

रंगभूमीवरील मैलाचा दगड ठरणाऱ्या ‘वाडा चिरेबंदी’, ‘मग्न तळ्याकाठी’ आणि ‘युगान्त’ या तीनही नाटकांच्या सलग प्रयोगांची सध्या चर्चा आहे. प्रेक्षकांची उत्सुकता ताणलेली असतानाच, या नाटकांवर या वर्षअखेरीस पडदा पडणार असल्याचं कळतं.

महेश एलकुंचवार यांच्या ‘वाडा चिरेबंदी’, ‘मग्न तळ्याकाठी’ या नाटकांनी जाणकार नाट्यरसिकांना मोठा आनंद दिला. ‘वाडा…’नंतर लागोपाठ ‘मग्न…’चा प्रयोगही सादर झाला. या प्रयोगालाही प्रेक्षकांकडून खूप चांगला प्रतिसाद मिळाला. त्यानंतर आता ‘युगान्त’ हे नाटकही रंगभूमीवर येत असून, एकत्रित तीनही नाटकं पाहण्याचा सुवर्णसंधी प्रेक्षकांना मिळणार आहे. या नाट्यत्रयीचे तीन सलग प्रयोग येत्या १ ऑक्टोबरला सादर होणार आहेत. विशेष म्हणजे हा अनोखा नाट्यानुभव घेण्यास प्रेक्षक उत्सुक असतानाच, ही नाटकं या वर्षाअखेरीस रंगभूमीवरुन एक्झिट घेणार असल्याची बातमी आहे.

‘युगान्त’निमित्त मुंटाशी बोलताना दिग्दर्शक चंद्रकांत कुलकर्णी म्हणाले, की 'मराठी व्यावसायिक रंगभूमीवरील प्रयोगशीलता अजूनही कायम आहे. प्रेक्षकांना नव्या संहितांसह अभिजात नाट्यकृतींचा आस्वाद घ्यायचा आहे. त्यासाठी अनेक रंगकर्मी सचोटीनं काम करताहेत. येणारा काळ मराठी रंगभूमीसाठी अत्यंत महत्त्वाचा आणि परिवर्तनात्मक असेल.'
तीन वर्षांपूर्वी रंगभूमीवर 'वाडा चिरेबंदी' उभं राहिलं होतं. त्यानंतर ‘मग्न तळ्याकाठी’ रंगभूमीवर अवतरलं. दोन्ही नाटकांनी चांगलं व्यावसायिक यश मिळवलं. त्यानंतर नाट्यरसिकांना प्रतीक्षा होती ती 'युगान्त' या ‘वाडा…’च्या तिसऱ्या भागाची. हे नाटक आता रंगभूमीवर येत असून, त्याचे मर्यादित म्हणजे अकरा प्रयोगच होणार आहेत. मुंबईत सात, पनवेल-औरंगाबाद इथे एक-एक तर पुण्यात दोन प्रयोग होतील.

या नाटकाचं सादरीकरण हे ‘वाडा चिरेबंदी’, ‘मग्न तळ्याकाठी’ या नाटकांच्या सलग सादरीकरणानंतर होणार आहे. या प्रयोगांसह हे नाट्य तीनशे प्रयोगांचा पल्ला गाठणार असल्याचं निर्मात्यांनी सांगितलं. 'युगान्त'मध्ये अभिनेता चिन्मय मांडलेकर, सिद्धार्थ चांदेकर आणि पूर्वा पवार हे कलाकार चमकणार आहेत.

पुढेही नाटक करायचंय
चंद्रकात कुलकर्णी यांच्यासोबत यापूर्वी ‘दुसरी गोष्ट’ या सिनेमातून मी काम केलंय. मात्र त्यांच्या नाटकामध्ये काम करण्यासाठी मी खूप उत्सुक होतो. ‘मग्न तळ्याकाठी’च्या निमित्तानं ती संधी मला मिळाली. त्यानंतर ‘युगान्त’ रंगभूमीवर येतंय. पण याचे केवळ अकरा प्रयोगाच होणार आहे. त्यामुळे मी थोडा नाराज आहे. पण, यापुढेही मला 'नाटक'च करायचं आहे.'
- सिद्धार्थ चांदेकर, अभिनेता

गेल्या तीन वर्षांपासून ‘वाडा चिरेबंदी’, त्यानंतर ‘मग्न तळ्याकाठी’ या दोन्ही नाटकांचे प्रयोग सुरू आहेत. त्यांना प्रेक्षकांचा चांगला प्रतिसाद मिळाला. अभिजात नाटकांची मालिका आम्ही देऊ शकलो हे मानसिक समाधान मोठं होतं. कलाकारांनी वेळ देऊन, मन लावून या नाटकांसाठी वेळ दिला. पण, आता कलाकारही खूप ठिकाणी व्यग्र झाल्यामुळे पुढच्या काळात त्यांना वेळ देणं कठीण जाणार आहे. हे लक्षात घेऊन आम्ही साधारण या वर्षअखेर नाटकांचे प्रयोग थांबवण्याचा निर्णय घेतला आहे.
दिलीप जाधव, निर्माते