पुणे टाइम्स टीम
'मला वाटतं, की मी प्रेम त्रिकोणात अडकले आहे. मी स्वत:वर, स्वत: मीवर आणि मी मीवरही प्रेम करते.' कशी वाटली ही पोस्ट? अनन्या पांडे हिची ही पोस्ट सध्या बरीच व्हायरल झाली आहे. 'स्टुडंट ऑफ द इअर-२' या सिनेमातून चित्रसृष्टीत पदार्पण केलेली अनन्या लवकरच 'पती पत्नी और वो' नावाच्या सिनेमात दिसणार आहे. कदाचित म्हणूनच तिच्या पोस्टमध्ये हा प्रेम त्रिकोण आला असावा. अनन्यानं सायबर बुलिंगच्या विरोधात मोठं कॅम्पेन चालवलं असून, तिला सोशल मीडियावर जबरदस्त फॅन फॉलोइंग आहे.
शालेय वयात असताना तिने लोकांच्या चिडविण्याला तोंड दिलेलं आहे. एका मुलाखतीमध्ये ती सांगते, 'शाळेमध्ये आम्ही गणवेषात असायचो. नेलपॉलिश आणि काजळ लावायला परवानगी नव्हती. तेव्हा मला ताण, परीक्षा असे बरेच प्रश्न सतावत होते. मी कितीही आणि काहीही खाल्लं तरी बारीकच दिसते. आपलं शरीर छान दिसावं असं वाटणं साहजिक आहे; परंतु मी जशी आहे तशी आता खूष आहे. पूर्वी असं नव्हतं. शाळेत मी अस्वस्थ असायचे; कारण गणवेषामुळे माझे किडकिडीत हात-पाय लोकांना दिसायचे. मी उंच असल्यामुळे इतरांशी वाकून बोलायचे, त्यावरही मला चिडवलं गेलं.'
आता मात्र परिस्थिती बदलली आहे. अनन्या सेलिब्रेटी झाली आहे आणि बुलिंगच्या विरोधात ठामपणे उभी आहे.