अमृता माझ्या आईला शिव्या द्यायची! : सैफ

मटा ऑनलाइन वृत्त । मुंबई

बॉलिवूडचा नवाब अर्थात सैफ अली खान अभिनयापेक्षा खासगी जीवनामुळेच चर्चेत असतो. वयाने बरीच मोठी असणारी अभिनेत्री अमृता सिंगशी झालेलं लग्न व नंतर घटस्फोटामुळेही सैफ प्रकाशझोतात आला होता. त्या दोघांनीही कधीच घटस्फोटाबद्दल कोणतंही स्पष्टीकरण दिलं नाही वा भाष्य केलं नाही. त्यांना वेगळं होऊन बराच काळ उलटला आहे आणि दोघेही आपापल्या वैयक्तिक जीवनात आनंदी असले तरी त्यांच्या लग्नाचा विषय पुन्हा चर्चेत आला आहे. आणि त्याला कारणीभूत आहे सैफने दिलेला एक इंटरव्ह्यू, ज्यामध्ये त्याने घटस्फोट आणि अमृताने दिलेली वाईट वागणूक याविषयी बरेच खुलासे केले आहेत. २००५ साली 'टेलिग्राफ'ला दिलेल्या मुलाखतीत त्याने अनेक कटू अनुभव कथन केले असून हा इंटरव्ह्यू सोशल मीडियावर खूप व्हायरल झाला आहे.

'तुम्ही बेकार असल्याची, तुम्हाला काहीही किंमत नसल्याची जाणीव सतत करून दिली जाते तेव्हा खूप वाईट वाटतं, मलाही वाटत असे. ती (अमृता) नेहमी मला घालून-पाडून बोलत असे आणि माझ्या आईला तसेच बहिणींनाही शिव्या द्यायची. मी बराच काळ हे सहन केलं' असं सैफने मुलाखतीत नमूद केलं होतं.

याशिवाय त्याने मुलाखतीत घटस्फोटानंतरचं जीवन, अमृताला पोटगीदाखल दिलेली रक्कम याबद्दलही चर्चा केली. 'घटस्फोटानंतर मी अमृताला ५ कोटी रुपये देणं अपेक्षित होतं, ज्यामधले २.५ कोटी मी आधीच तिला दिेले होते. तसंच माझा मुलगा १८ वर्षांचा होईपर्यंत मी तिला दर महिन्याला १ लाख रुपये देत राहीन. मी काही शाहरूख खान नाहीये, माझ्याकडे तितका पैसाही नाही. पण मी अमृताला वचन दिलं होतं की मी तिला ठरल्याप्रमाणे संपूर्ण रक्कम देईन. जाहिराती, स्टेज शो आणि चित्रपटातून मी जे काही पैसे कमावले ते मी माझ्या मुलांसाठीच दिले' असंही सैफने सांगितलं.

सध्या सैफ पत्नी करीना कपूर खान आणि मुलगा तैमूरसह आनंदी जीवन जगत आहे. तर अमृता सिंग मुलांच्या संगोपनावर लक्ष देत असून तिची मुलगी सारा लवकरच बॉलिवूडमध्ये पदार्पण करणार आहे.