अमायरा दस्तूर म्हणते, सोशल मीडिया डेंजरस!

मुंबई: ‘जजमेंटल है क्या’ आणि ‘प्रस्थानम्’ या चित्रपटांमध्ये काम केलेली अभिनेत्री अमायरा दस्तूरनं सध्या सोशल मीडियाचा धसका घेतला आहे. इथं फारच भयावह परिस्थिती असल्याचं तिचं निरिक्षण आहे.

'द ट्रिप' या वेबसीरिजमुळे प्रकाशझोतात आलेली अमायरा एका मुलाखतीदरम्यान म्हणाली, ‘पार्ट्यांमध्ये जाणं आणि त्याचे तपशील सोशल मीडियावर टाकणं किंवा उगाच काही पोस्ट करणं हे माझ्या तत्त्वांमध्ये बसत नाही. मात्र, इतरांच्या पोस्ट आणि त्यावर लोक व्यक्त झालेले पाहता इथली परिस्थिती फारच भयावह असल्याचं दिसतं. म्हणूनच, मी इथं फारशी रमत नाही. आपण खालच्या पातळीवर जाऊन इतरांवर टीका कशी काय करू शकतो, हे मला आजही समजलेलं नाही. ट्रोलर्समंडळी इतरांची मतं मान्य करू शकत नाहीत. त्यामुळे इथं न आलेलं चांगलं असं मला वाटतं.’

आजची तरुणाई सोशल फावल्या वेळात सोशल मीडियावर रमत असताना अमायराला मात्र ते आवडत नाही. ती फावल्या वेळात काय करते असं विचारल्यावर ती म्हणाली, 'ज्यावेळी माझ्या एखाद्या चित्रपटाचे किंवा वेब सीरिजचे चित्रीकरण नसते त्यावेळी मला फिरायला जाणं आवडतं. मी एकटीच बॅग घेऊन कुठेतरी निघते आणि मनसोक्त फिरते. नव्या ठिकाणी जाऊन तिथल्या लोकांना जाणून घेणे त्यांची संस्कृती जाणून घेणे मला आवडते. मी फिरायला गेल्यावर मला फोटो काढायला आणि ते सोशल मीडियावर शेअर करायला आवडते. पण मी केवळ लाईक्स मिळवण्यासाठी फोटो शेअर करत नाही. मी जी पोस्ट शेअर करेन त्याला काहीतरी अर्थ असायला पाहिजे असं मला वाटतं' असं ती म्हणाली.
आपल्या भूमिकेसाठी कलाकार अनेक गोष्टी शिकत असतात. अमायरा दस्तूरदेखील याच कलाकारांपैकी एक आहे. 'इश्क'मधून बॉलिवूडमध्ये पदार्पण करणाऱ्या अमायरा दस्तूरनं 'द ट्रिप २' या तिच्या वेबसीरिजसाठी अशीच मेहनत घेतली होती. या वेबसीरिजसाठी ती बऱ्याच नवीन गोष्टी शिकली. त्यातलीच एक म्हणजे स्कूबा डायव्हिंग. या वेबसीरिजचं चित्रीकरण सध्या पाँडिचेरीमध्ये झालं. तिथल्याच खोल समुद्रात तिनं प्रशिक्षण घेतलं. स्कूबा डायव्हिंगचं प्रशिक्षण घेतल्यावर डायव्हिंगचा व्यावसायिक परवानाही ती घेणार आहे असं तिनं सांगितलं.