त्या माझ्या आदर्श

बॉलिवूडमधल्या या काही मोजक्या महिला ज्यांनी मला... ‘तू आहे तशीच उत्तम आहेस’ हा आत्मविश्वास दिला आहे. शर्मिला टागोर, मंदाकिनी, डिंपल कपाडिया, झीनत अमान... एवढ्यात शब्दांत सनी लिओनीनं ट्विट केलं आणि अल्पावधीतच त्यावर प्रतिक्रियांचा पाऊस पडायला सुरुवात झाली. विशेष म्हणजे, या ट्विटमध्ये सनीनं त्यांचे बोल्ड अंदाजातले फोटोही पोस्ट केले आहेत.

सनीच्या म्हणण्यानुसार, या अभिनेत्रींवरही त्याकाळात टिका झाली मात्र त्यांनी त्याकडे दुर्लक्ष केलं. त्यामुळे या सगळ्यांचा आदर्श ठेवतच आपण स्वतःत काही बदल करण्याची गरज नाही, असं सनीनं म्हटलं आहे. या अभिनेत्रींचा तिनं माझे आदर्श असा थेट उल्लेख केलेला नसला तरी तिच्या ट्विटमधून तोच अर्थ निघत आहे. एवढंच कारण नेटकऱ्यांना पुरल्यावर त्यांनी सनीवर टीकेची झोड उठवली; तर काहींनी तिला पाठिंबा देणारे ट्विटही केले. सनीनं सगळ्या ट्विटला उत्तर देण्याचं सौजन्यही दाखवलं. सध्या तिचा शो बंगळूरमध्ये होऊ नये, यासाठी अनेकांनी आंदोलनं करण्याचा तर काहींनी आत्महत्त्या करण्याचा इशाराही दिला आहे. एका चाहत्यानं याबद्दल विचारलं असता सनी म्हणते, ‘मृत्यूपेक्षा आयुष्य हीच गोष्ट समोर असायला हवी आणि माझा युद्धावर नाही तर प्रेमावर भरवसा आहे.’ तिनं यावर्षी हुशारीनं मतदान करा, असा सल्लाही चाहत्यांना दिला आहे.

विशेष ट्रेनिंग

अभिनेता अरबाझ खानसोबत काही दिवसांपूर्वी येऊन गेलेला सनीचा सिनेमा आपटला आहे. मात्र निराश न होता तिनं दोन सिनेमे आणि आणखी एका प्रोजेक्टवर काम करायला सुरुवात केली आहे. केपटाऊन इथला प्रसिद्ध फिटनेसतज्ज्ञ लिआन वेन्टझेलसोबतचा फोटो पोस्ट करत सनीनं ‘ट्रेनिंग विथ द बिस्ट’ अशा आशयाचं ट्विटही केलं आहे. सनी तिच्या आगामी सिनेमासाठीच हे ट्रेनिंग घेत असल्याचं सूत्रांकडून समजतं. सध्या सनी जिथं जाईल तिथं लेकीला नेणं ती पसंत करते. शूटिंगच्या शेड्यूलमध्ये मुलीला वेळ देणं जमत नाही, त्यामुळे ती सेटवर माझ्यासोबत असणं मला अधिक महत्त्वाचं वाटतं. आम्हा दोघांपैकी एकजण घरी असेल तरच आम्ही निशाला घरी ठेवतो, असं सनी सांगते. तिचा पती डॅनियल घरी असेल तेव्हाच ती मुलीला घरी ठेवते. सध्या ट्रोलर्सना सकारात्मक पद्धतीनं सामोरं जायचं असं तिनं ठरवलं आहे.