पुणे टाइम्स टीम
नुकत्याच प्रदर्शित झालेल्या 'बाला' या सिनेमामध्ये अभिनेत्री यामी गौतम ही टिकटॉक सुपरस्टार म्हणून दिसली आहे. ती टिकटॉकचा कायम वापर करत असावी, असं त्यावरून वाटत असलं, तरी प्रत्यक्ष आयुष्यात तिला टिकटॉक वापरता येत नाही. ती म्हणते, 'सिनेमातील माझी भूमिका टिकटॉक सुपरस्टार आहे. ती दिवसभर टिकटॉक व्हिडिओ बनवत असते. खऱ्या आयुष्यात मात्र मला टिकटॉकमधला 'ट'देखील माहीत नाही. मला ते वापरताही येत नाही. मी इथे पहिल्यांदा अकाउंट उघडले, तेव्हा थक्क झाले होते. ते वेगळंच जग आहे. हे धमाल विश्व आहे. इथले लोक व्हिडिओ मात्र अगदी गांभीर्यानं आणि व्यावसायिक पद्धतीनं तयार करतात. दहा सेकंदाच्या व्हिडिओमध्ये ते आपली सर्जनशीलता दाखवितात. शूटिंगसाठी हे सारं पाहणं आवश्यक होतं. काही व्हिडिओही करायचे होते. तसे मी केले; परंतु अजून पोस्ट केलेले नाहीत. शूटिंग संपल्यावर मी ते अकाउंट पुन्हा पाहिलेलंही नाही.'