‘राझी’नं केलं प्रभावित: आलिया भट्ट

तरुणाईची लाडकी अभिनेत्री आलिया भट आगामी ‘राझी’ या चित्रपटातून प्रेक्षकांसमोर येतेय. रोमांचक कथा असलेल्या या सिनेमात आलिया एका हुशार आणि देशाभिमानी तरुणीच्या भूमिकेत दिसेल. जंगली पिक्चर्स अँड धर्मा प्रोडक्शन्सनिर्मित ‘राझी’ हा चित्रपट मेघना गुलजार यांनी दिग्दर्शित केला आहे. विनीत जैन, करण जोहर, हिरु यश जोहर आणि अपूर्व मेहता यांनी या चित्रपटाची निर्मिती केली आहे. चित्रपटामधला तिचा हा वेगळा लुक आज प्रदर्शित करण्यात आला. सिनेमाच्या निमित्तानं तिने ‘मुंटा’शी खास बातचीत केली.


>> एक रोमांचक कथा असलेला 'राझी' हा चित्रपट तू करतेयस. काय सांगशील?

- आपण नेहमी रोमँटिक कथा असलेले चित्रपट पाहतो. पण, देशप्रेम किती महत्त्वाचं असतं हे चित्रपटातून दाखवण्यात आलं आहे. मी पहिल्यांदाच एखाद्या रोमांचक कथा असलेल्या चित्रपटात काम केलंय. चित्रपट खऱ्या कथेवर आधारित असल्याने त्याच्या गोष्टीनं मला जास्त आकर्षित केलं. कारण मी आजपर्यंत कधीच खऱ्याखुऱ्या कथेवर आधारित सिनेमामध्ये काम केलेलं नाही. त्यामुळे या पद्धतीच्या कथानकावर काम करणं माझ्यासाठी खूप मोठी आणि छान गोष्ट आहे. बऱ्याच गोष्टी यावेळी मी पहिल्यांदाच केल्या आहेत.
>> यावेळी पहिल्यांदाच तू एका वेगळ्या भूमिकेत दिसणार आहेस. तू नक्कीच त्याबाबत उत्साही असशील...

- नाजूक, पण खूप हुशार आणि स्वदेशाभिमान असलेली ही एक तरुण मुलगी आहे असं मी आवर्जून सांगेन. तिला तिच्या आयुष्यात काही जबाबदाऱ्या घ्याव्या लागतात. आधी एक मुलगी, नंतर परिस्थिती पाहून तिला एका पत्नीच्या भूमिकेत यावं लागतं. मध्येच ती एक गुप्तचरही बनते. माझी भूमिका विविधांगी आहेच. पण, सिनेमातल्या या मुलीच्याही अनेक भूमिका चित्रपटात पाहायला मिळतील.


>> तू भूमिकेसाठी पिस्तूल चालवायला शिकलीस. कसा होता हा अनुभव ?

- खरं तर मला थोडी भीतीच वाटली होती. माझ्या आजूबाजूला मोठा आवाज झाला, तरी मी चटकन दचकते. चित्रीकरणाच्या वेळी पिस्तूल चालवताना माझ्या हाताला थोडं लागलंही होतं.


>> चित्रपटाच्या दिग्दर्शिका मेघना गुलझार यांच्याबद्दल काय सांगशील?

- मेघना यांनी केलेल्या चित्रपटांपैकी ‘तलवार’ हा माझा आवडता चित्रपट आहे. चित्रपटाशी निगडित सगळ्या गोष्टी त्यांना माहिती असतात. मग ते चित्रपटाचे संवाद असोत, भूमिका असोत वा त्यांचे कपडे...सगळ्या गोष्टींची माहिती त्यांना असते. खरं तर तू एकटीच संपूर्ण चित्रपट बनवू शकतेस असं मी तिला नेहमी सांगते. ती नेहमी येऊन सगळ्या गोष्टी करायची. मेघना कलाकाराला त्यांच्या भूमिकेबद्दल विचार करायला वेळ देते. त्यानंतरच इतर सूचना सांगते. त्यामुळे त्या कलाकाराला एखाद्या दृश्यासाठी वेळ मिळतो, ही तिची चांगली गोष्ट मला आवडते.


>> युद्धावर आधारित चित्रपट असल्याने चित्रीकरण करताना काही आव्हानामक वाटलं का?

- हो, नक्कीच वाटलं. चित्रपटाची कथा तशी असल्याने दिग्दर्शक आणि सिनेमॅटोग्राफर यांच्या दृष्टीने ते उत्तम पद्धतीने चित्रित केलं गेलं. एक कलाकार म्हणून आम्हाला अभिनय करायचा होता. पण ते वातावरण निर्माण करणं फार आव्हानात्मक असतं. एखादं दृश्य चित्रित करताना समजलं की प्रत्यक्षात ही गोष्ट त्या माणसांबरोबर कशी घडली असेल.


>> चित्रीकरणादरम्यान सैनिकांशी काही बोलणं झालं होतं का?

- आम्ही याचं बरंचसं चित्रण हे सैनिकी क्षेत्रात केलं आहे. चित्रीकरणाच्या वेळी आम्हाला लागणाऱ्या अनेक गरजेच्या गोष्टींची त्यांनी नीट काळजी घेतली होती. आम्हा सर्वांना खरोखर आपल्या घरी आल्यासारखं वाटत होतं.