'व्हेंटिलेटर'वरुन 'संजू'कडे
विनय राऊळ
संजय दत्तवरील जीवनपटाची सध्या खूप चर्चा आहे. या सिनेमासाठी संगीत देणारी जोडी मराठी आहे. रोहन-रोहन यांनी या चित्रपटाला संगीत दिलं असून, यानिमित्तानं त्यांनी 'मुंटा'शी गप्पा मारल्या. 'व्हेंटिलेटर'चं संगीत आवडल्यामुळे 'संजू'ची संधी मिळाल्याचं या दोघांनी सांगितलं. या निमित्तानं अजय-अतुल यांच्यानंतर आणखी एक मराठी संगीतकारांची जोडी बॉलिवूडमध्ये ठसा उमटवण्यासाठी सज्ज आहे.
'व्हेंटिलेटर' या प्रियांका चोप्राच्या पहिल्या मराठी सिनेमातली गाणी प्रेक्षकांना आवडली. 'संजू'च्या निवडीबद्दल सांगताना रोहन प्रधान म्हणाला, की 'आमच्या 'व्हेंटिलेटर' चित्रपटाचा मामी फेस्टिव्हलमध्ये प्रीमिअर होतं. त्यावेळी राजकुमार हिरानी चित्रपट पाहण्यासाठी आले होते. त्यानंतर चार-पाच दिवसांनी आम्हाला राजेश मापुस्कर यांचा फोन आला. हिरानी यांनी भेटायला बोलावल्याचं त्यांनी सांगितलं. आमच्यासाठी हा आश्चर्याचा धक्का होता. त्यांच्या ऑफिसमध्ये पोहोचल्यावर त्यांनी 'व्हेंटिलेटर'मधील आमच्या कामाचं कौतुक केलं. माझ्या चित्रपटासाठी तुम्ही संगीत द्याल का? असं त्यांनी विचारलं. आम्हीही लगेच होकार दिला.'
चित्रपटाच्या गाण्यांबाबत तो म्हणाला, की 'या गाण्यांसाठी आम्ही सहा ते आठ महिने काम केलंय. राजकुमार यांना सिनेमासाठी सगळं व्यवस्थित लागतं. त्यामुळे चित्रपटातल्या या गाण्यांसाठी आम्हीही तसा वेळ घेतला. आपलं काम बघून जेव्हा काम मिळतं ते आपल्याला नेहमीच आवडतं. लहानपणापासून मी स्वतः संजय दत्तचा चाहता आहे. त्याच्या चित्रपटासाठी संगीत देण्याची संधी मिळणं ही मोठी संधी आहे. त्यामुळे इथे स्वतःला सिद्ध करून दाखवायचं होतं. आता सिनेमाच्या प्रदर्शनासाठी आम्हीही उत्सुक आहोत.'