इशाऱ्यांचा खेळ चाले!

इशाऱ्यांचा खेळ चाले!'रात्रीस खेळ चाले २' या मालिकेच्या गेल्या महिन्याच्या भागात मद्यपानाच्या दृश्यामध्ये सावधानतेचा इशारा दाखवणं चॅनलवाले चक्क विसरले. 'मुंटा'नं हे चॅनलच्या निदर्शनास आणून दिल्यानंतर ती इशाऱ्याची पट्टी प्रोमोमध्ये दाखवण्यात आली, पण प्रत्यक्ष तो भाग प्रक्षेपित झाला तेव्हा ती पट्टी गायब होती. त्यामुळे मालिकावाल्यांचं नक्की काय चालू आहे? असा प्रश्न प्रेक्षकांना पडला आहे.


छोट्या पडद्यावर धूम्रपान किंवा मद्यपानाची दृश्यं असतील तर 'धूम्रपान/मद्यपान आरोग्यास हानिकारक आहे' अशा इशारा देणं नैतिकदृष्ट्या बंधनकारक आहे. पण 'रात्रीस खेळ चाले २'च्या मागील महिन्यातील काही भागांमध्ये अशा मद्यपानाच्या दृश्यांवेळी हा इशारा देणं चॅनलवाले पांडूप्रमाणे 'इसरले'! यासंदर्भात 'मुंटा'नं ४ मे रोजी 'विसरलात?' या मथळ्या अंतर्गत बातमी केली आणि चॅनलला प्रेक्षकांच्या हितार्थ इशाराची देण्याची आठवण करून देण्याचा प्रयत्न केला. 'मुंटा'च्या बातमीनंतर पुढील भागांमधील मालिकेच्या प्रोमोमध्ये मद्यपानचे दृश्य असल्यामुळे त्यांनी आठवणीनं 'वैधानिक चेतावणी' दिली, पण हा प्रोमो ज्या भागाचा होतो तो भाग जेव्हा टीव्हीवर प्रक्षेपित झाला तेव्हा तो इशाऱ्याची पट्टी गायब होती.

धूम्रपान किंवा मद्यपानाचं दृश्य असल्यास तसा सावधानतेचा इशारा स्क्रिनवर दाखवणं आवश्यक असतं. तशी मार्गदर्शक तत्व 'इंडियन ब्रॉडकास्टिंग फाऊंडेशन'नं सर्व मालिका निर्मात्यांना आणि वाहिनी व्यवस्थापकांना आखून दिली आहे. पण या मार्गदर्शक तत्वातून पळवाटा काढल्या जात आहेत. गेल्या महिन्यात 'रात्रीस खेळ चाले२' मालिकेत मद्यपानाच्या दृश्यांना कोणतीही चेतावणी नव्हती. त्यामुळे मालिकावाल्यांचं नेमकं चाललंय काय? असा प्रश्न प्रेक्षकांना पडला आहे. ते मद्य नसून ताक आहे, असं सांगून पळवाट काढण्यात आली. त्यात भर पडली ती संकलनाची. कारण मालिकेतील ते दृश्य अत्यंत हुशारीनं आणि शिताफीनं संकलित करण्यात आलं होतं.

प्रेक्षकहो, तुम्हाला काय खटकतंय?

टीव्हीवरील मालिका, रिअॅलिटी शोमध्ये सध्या 'आलं चॅनेलच्या मना' असा कारभार दिसून येतोय. 'रात्रीस खेळ चाले २' प्रमाणे इतर कोणत्या मालिकांमध्ये दाखवण्यात आलेलं काय-काय खटकतं? हे आम्हाला muntainbox@gmail.com या ई-मेल आयडीवर नक्की कळवा. सोबत मालिकेचं नाव, प्रक्षेपणाची तारीख आणि तुम्हाला काय खटकलं? याचा संदर्भ द्यायला विसरू नका.