'भाई बोलणाऱ्या हिरोइनशी रोमान्स कसा करायचा?'

मटा ऑनलाइन वृत्त । मुंबई

'गँग्स ऑफ वासेपूर'मध्ये नवाझुद्दीन सिद्दिकी आणि हुमा कुरेशीला रोमँटिक दृश्य द्यायचं होतं. मात्र, शूटिंगच्या वेळी हुमा त्याला 'नवाझ भाई' म्हणून बोलवत होती. त्यामुळं तो संतापला. 'भाई' म्हणून हाक मारणाऱ्या मुलीबरोबर रोमान्स कसा करायचा?, अशी तक्रारच त्यानं दिग्दर्शक अनुराग कश्यपकडं तक्रार केली होती.

एक रिअॅलिटी शोमध्ये दिलेल्या मुलाखतीत नवाझुद्दीननं हा किस्सा सांगितला. 'बॉलिवूडमध्ये सध्या मी सर्वाधिक पैसे कमावणारा अभिनेता आहे,' असा दावाही त्यानं यावेळी केला. 'अभिनयासाठी म्हणून मिळणाऱ्या मानधनाचा विचार केला तर बॉलिवूडमध्ये सध्या मला सर्वात जास्त पैसे मिळतात. मानधनाबद्दल मला कधी सांगण्याची गरजच लागली नाही. चित्रपट निर्मात्यांनी स्वत:च मला पैसे वाढवून द्यायला सुरुवात केली,' असं त्यानं सांगितलं.