इतिहासकार करणार 'पद्मावती'ची समीक्षा

जयपूर: वादग्रस्त 'पद्मावती' चित्रपटाची समीक्षा करण्यासाठी सेन्सॉर बोर्डानं जयपूरच्या इतिहासकारांना निमंत्रित केलं आहे. चित्रपटाबद्दल त्यांची मतं जाणून घेण्यात येणार आहेत. चित्रपटातील ऐतिहासिक संदर्भांची समीक्षा करण्यासाठी बोर्डाचे अध्यक्ष प्रसून जोशी यांनी ज्येष्ठ इतिहासकार प्रा. आर. एस. खंगारोत आणि राजस्थान विद्यापीठाचे निवृत्त प्राध्यापक बी. एल. गुप्ता यांना बोलावलं आहे.

राणी पद्मावतीचा चुकीचा इतिहास दाखवण्यात आल्याचा आरोप करत करणी सेना आणि राजपूत नेत्यांनी या चित्रपटाला विरोध केला होता. हा चित्रपट १ डिसेंबरला प्रदर्शित होणार होता. मात्र, वाढता विरोध लक्षात घेऊन त्याचं प्रदर्शन पुढं ढकललं गेलं आहे. हा वाद सोडवण्यासाठी सेन्सॉर बोर्डानं समितीही स्थापन केली आहे. आता चित्रपटातील ऐतिहासिक संदर्भांची समीक्षा करण्यासाठी बोर्डानं इतिहासकार खंगारोत आणि गुप्ता यांना निमंत्रण पाठवलं आहे.

याबाबत खंगरोत म्हणाले की, 'हा वाद चित्रपट निर्माता संजय लीला भन्साळी आणि राजपूत समाज किंवा करणीसेना आणि भन्साळी यांच्यातील नाही. तर हा वाद निर्माता आणि इतिहासातील असल्याचा मानला जातो. याच दृष्टीकोनातून चित्रपटाची समीक्षा केली जाईल.' तसंच 'चित्रपटातील ऐतिहासिक तथ्ये बरोबर आहेत किंवा नाहीत याबाबत चित्रपट पाहिल्यानंतर याबाबत बोलता येईल. स्क्रीनिंगआधीच काही सांगता येणार नाही,' असे गुप्ता यांनी सांगितले.