खेळताना रंग बाई होळीचा…

होळी-रंगपंचमीला सगळेजण एकत्र येऊन धमाल करतात. तर मग याला आपले मराठी तारे-तारकाही अपवाद कसे असतील? रंगपंचमीला त्यांनी केलेली धमाल, त्यांचे मजेशीर किस्से त्यांनी खास मटाशी शेअर केलेत.

आईलाच लावला रंग
दरवर्षी परीक्षेच्या काळातच होळीचा सण असायचा. त्यामुळे नाईलाजानं घरी बसून अभ्यास करावा लागायचा. माझी दहावीची परीक्षा सुरू असताना एका पेपरच्या आधी एक दिवस मोकळा मिळत होता. अभ्यासही झाला होता. पण खूप विनवण्या करूनही रंगपंचमी खेळायला आई घराबाहेर सोडत नव्हती. माझ्या सर्व मैत्रिणी बाहेर खूप मज्जा करत होत्या. मी माझ्या मैत्रिणींना इशारा केला आणि सांगितलं की, घरात येऊन आईलाच रंग लावा. त्यांनी तसं केलंही. याच संधीचा फायदा घेत मीही आईला रंग लावला आणि मैत्रिणींबरोबर रंग खेळायला बाहेर सटकले. आई ओरडून मला थांबायला सांगत होती, पण मी कसली थांबतेय. मी छानपैकी रंग खेळून घरी आले. घरी येईपर्यंत आईचा रागही निवळला होता.
- श्रेया बुगडे, अभिनेत्री

समुद्रावर होळी
लहानपणी एकदा रंगपंचमी खेळताना, मित्र-मैत्रिणींपैकी कुणीतरी मागून येऊन नकळत माझ्या चेहऱ्याला रंग फासला. तो रंग माझ्या नाका-तोंडात गेला होता. त्यांनतर मी दोन-तीन दिवस आजारीच होते. त्यावर्षीपासून मी पुढे कधी रंगांची होळी खेळले नाही. रंगांपासून मी लाबंच राहायचे. त्यानंतर हॉटेल मॅनेजमेंटच्या शिक्षणासाठी गोव्यात असताना मी कॉलेजच्या वर्षात होळी खेळले. पण रंग न वापरता. गोव्यात शिमगा मोठ्या थाटात साजरा केला जातो. होळीच्या दिवशी आम्ही कॉलेजच्या मैत्रिणी समुद्रकिनाऱ्यावर जाऊन नुसती पाण्याने होळी खेळायचो. समुद्राच्या खाऱ्या पाण्यात एकमेकाला ढकलायचो. रेतीतच एकमेकांना लोळवायचो. रेती हाच आमचा रंग असायचा
- तितिक्षा तावडे, अभिनेत्री

अंड्यांमुळे हैराण
एका वर्षी आम्ही मैत्रिणींनी एकीच्या घरी जमून रंग खेळण्याचा बेत आखला होता. रंगपंचमीच्या दिवशी आम्ही खूप धमालमस्ती करत होतो. आमच्या कॉलेजची काही मुलं देखील आमच्यापासून थोड्या अंतरावर रंग खेळत होते. त्यांच्यामध्ये माझ्या मैत्रिणींपैकी एकीचा भाऊही होता. त्यामुळे आम्ही एकत्र खेळू लागलो. मुलं मुद्दाम पाण्याच्या पिशव्या आमच्यावर मारु लागली. त्यात एकाने डोक्यावर अंड फोडलं. अंड्याचा वास मला अजिबात आवडत नाही. मी तसं बोललेही. त्याबरोबर लगेच माझ्या मैत्रिणींनी आणि त्या मुलांनी मिळून माझ्या डोक्यावर भरपूर अंडी फोडली. त्या सगळ्याचा मला खूप वीट आला होता. त्या अंड्याच्या वासानं मी अक्षरशः हैराण झाले होते. केस धुवायला मी अर्धा तास पाणी शोधत होते. पण, जेव्हा केस धुतले तेव्हा मात्र माझे केस मात्र रेशमी झाले होते.
ईशा केसकर, अभिनेत्री

शब्दांकन - कल्पेशराज कुबल, कॉलेज क्लब रिपोर्टर