भयपटांचे किंग श्याम रामसे यांचे मुंबईत निधन

मुंबई: हिंदी चित्रपटसृष्टीत अग्रगण्य भयपट निर्माते रामसे ब्रदर्स यांच्यापैकी एक असलेले भयपटांचे किंग दिग्दर्शक श्याम रामसे यांचे काल (बुधवार) निधन झाले. ते ६७ वर्षांचे होते. आज त्यांच्या पार्थिवावर मुंबईतील विलेपार्ले येथील अंत्यसंस्कार करण्यात येणार आहेत.

श्याम रामसे हे गेल्या अनेक दिवसांपासून न्यूमोनियाने त्रस्त होते. मुंबईतील एका रुग्णालयात उपचार घेत असतानाच त्यांची प्राणज्योत मालवली. श्याम रामसे यांच्या पश्चात साशा आणि नम्रता अशा दोन मुली आहेत.

भयपटांची निर्मिती करण्यात ९० च्या दशकात रामसे ब्रदर्स यांचा बोलबाला होता. या काळात श्याम रामसे यांनी गेस्ट हाऊस, सामरी, पुरानी हवेली, बंद दरवाजा आणि वीराना अशा भयपटांचे दिग्दर्शन केले.



१७ मे १९५२ साली जन्मलेल्या श्याम रामसे यांनी अनेक संस्मरणीय भयपट देऊन हिंदी चित्रपटसृष्टीत आपली वेगळी ओळख निर्माण केली. त्यांनी एकूण ३० चित्रपटांचे दिग्दर्शन केले आहे.

चित्रपट निर्माते सुमित काडेल यांनी श्याम रामसे यांना श्रद्धांजली वाहिली आहे. रामसे यांनी अनेक संस्मरणीय अशा भयपटांची निर्मिती केल्याचे ते म्हणाले.