हृतिक-कंगना वादाची फाइल बंद?

मटा ऑनलाइन वृत्त । मुंबई

अभिनेता हृतिक रोशन आणि अभिनेत्री कंगना राणावत यांच्यातील वादावर अखेर कोणत्याही निकालाशिवाय पडदा पडण्याची चिन्हे आहेत. hroshan@email.com या ई-मेल आयडीवरून कंगनाला नेमके कुणी ई-मेल पाठवले होते, याचा उलगडा फॉरेन्सिक तपासणीतूनही होऊ न शकल्याने पोलीस याप्रकरणाची फाइल बंद करण्याच्या विचारात आहेत.

'संबंधित ई-मेल आयडीबाबत कोणतीही ठोस माहिती मिळू शकलेली नाही. त्याचा सर्व्हर अमेरिकेत असल्याने हे ई-मेल अकाउंट नेमकं कोण वापरत आहे, याचा शोध घेण अवघड आहे. सध्या जो काही दस्तावेज आमच्याकडे आहे तो अपुरा आहे आणि त्यामुळेच तो आधार धरून आम्ही ही या प्रकरणाची फाइल बंद करण्याचा विचार करत आहोत', असे गुन्हे शाखेचे सह आयुक्त संजय सक्सेना यांनी सांगितले.

मिळालेल्या माहितीनुसार, फॉरेन्सिक लॅबकडून सादर करण्यात आलेल्या अहवालात 'नील' असे नमूद करण्यात आले आहे. त्यामुळे ही केस संपल्यात जमा आहे, असे एक वरिष्ठ अधिकारी म्हणाला.

दरम्यान, हृतिकने आपल्याला काही खासगी आणि रोमॅन्टिक ई-मेल पाठवल्याचा आरोप कंगनाने केल्याने तिथेच वादाची ठिणगी पडली होती. त्यानंतर हृतिकने सर्व आरोप फेटाळत कंगनाला आव्हान दिलं होतं. या दोघांमधील वाद मग पोलिसांपर्यंत गेला. वांद्रे-कुर्ला संकुल येथील सायबर सेल याप्रकरणी चौकशी करत आहे. मात्र, तपासात प्रगती होण्यासाठी ठोस पुरावे हाती लागत नसल्यानेच ही केस बंद करण्याची तयारी पोलिसांनी सुरू केली आहे.