अमिताभ यांच्यावर देशभरातून शुभेच्छांचा वर्षाव

मटा ऑनलाइन वृत्त । मुंबई

महानायक अमिताभ बच्चन यांच्या ७५व्या वाढदिवसानिमित्त आज देशभरातून शुभेच्छांचा वर्षाव झाला. राष्ट्राध्यक्ष रामनाथ कोविंद, पंतप्रधान नरेंद्र मोदी यांच्यासह सर्वांनीच आपल्या लाडक्या महानायकाच्या निरोगी दीर्घायुष्यासाठी प्रार्थना केली. दरम्यान, अमिताभ यांनी भरभरून शुभेच्छा देणाऱ्या चाहत्यांचे रात्री उशिरा ट्विटरवरून आभार मानले.

अमिताभ बच्चन सहकुटुंब मालदीवला गेले आहेत. तिथे पुढचे चार ते पाच दिवस त्यांचा मुक्काम असणार आहे. कोणताही बडेजाव न करता साधेपणाने आपला वाढदिवस साजरा व्हावा, अशीच इच्छा त्यांनी आधीच बोलून दाखवली होती. त्यामुळेच रविवारी जलसाबाहेर जमलेल्या चाहत्यांची प्रेमपूर्वक भेट घेऊन व त्यांच्या शुभेच्छांचा नम्रपणे स्वीकार करून अमिताभ मालदीवला रवाना झाले.

आज वाढदिवशी अमिताभ भारतात नसले तरी त्यांच्या चाहत्यांचा उत्साह मात्र तसूभरही कमी झालेला नव्हता. मुंबईसह कोलकाता, जम्मू व देशाच्या अन्य भागांत अनोख्या पद्धतीने अमिताभ यांचा वाढदिवस साजरा करण्यात आला.

मुंबईत वांद्रे पश्चिम येथील काडेश्वरी मंदिर बाग येथील दूर्गा इमारतीवर 'दिवार'मधील अमिताभ यांचं २३० फूट उंच चित्र साकारत चित्रकार रणजीत दहिया यांनी अमिताभ यांना शुभेच्छा दिल्या. जम्मूमध्ये केक कापून आनंद द्विगुणित करण्यात आला तर कोलकात्यात अमिताभ यांच्या दीर्घायुष्यासाठी प्रार्थना करण्यात आली. शिवाय अमिताभ यांच्या 'डुप्लिकेट'भोवतीही चाहत्यांचा गराडा पाहायला मिळाला.



एका वृत्तानुसार मालदीवमधील एका खासगी बेटावर अमिताभ यांच्यासह जया बच्चन, अभिषेक, ऐश्वर्या, आराध्या, श्वेता नंदा आणि नात नव्या या सर्वांचा मुक्काम असून तिथेच अमिताभ यांचा वाढदिवस कुटुंबाने साजरा केला आहे. याबाबत अद्याप कोणतीही अधिकृत माहिती बच्चन कुटुंबाकडून देण्यात आलेली नाही.

दरम्यान, अमिताभ यांनी वाढदिवसाच्या भरभरून शुभेच्छा देणाऱ्या आपल्या चाहत्यांचे रात्री उशिरा ट्विटरवरून आभार मानले.


T 2575 - My joy and delight in all that have wished me is beyond expression .. I thank them all .. individually would take some time .. pic.twitter.com/l0lTScrxmP — Amitabh Bachchan (@SrBachchan) October 11, 2017