ए. आर. रेहमान पुन्हा ऑस्करच्या शर्यतीत

मटा ऑनलाइन वृत्त । लॉस एंजलिस

'स्लमडॉग मिलेनियर' या चित्रपटातील संगीतासाठी सर्वोच्च 'ऑस्कर' पुरस्कारावर नाव कोरणारा प्रख्यात भारतीय संगीतकार ए. आर. रेहमान पुन्हा एकदा 'ऑस्कर'च्या शर्यतीत आला आहे. 'पेले: बर्थ ऑफ ए लिजंड' या हॉलिवूडपटातील एका गीतासाठी रेहमानला ऑस्करच्या यादीत नामांकन मिळालं आहे. जगातील दिग्गज संगीतकारांबरोबरची ही शर्यत रेहमान पुन्हा एकदा पार करतो का याविषयी संगीतरसिकांमध्ये प्रचंड उत्सुकता आहे.

८९व्या ऑस्कर पुरस्कारासाठीच्या नामांकनांची प्राथमिक यादी 'अॅकॅडमी ऑफ मोशन पिक्चर आर्ट्स अँड सायन्स'च्या अधिकृत संकेतस्थळावर मंगळवारी जाहीर करण्यात आली आहे. त्यातील बेस्ट ओरिजिनल स्कोअर व बेस्ट ओरिजिनल साँग अशा दोन विभागांत रेहमाननं संगीतबद्ध केलेल्या 'गिंगा' या गाण्याला स्थान मिळालं आहे. नामांकनाच्या अंतिम यादीत स्थान मिळविण्यासाठी रेहमानला ओरिजिनल स्कोअर विभागात १४५ तर, ओरिजिनल साँग विभागात ९१ संगीतकारांच्या रचनांशी स्पर्धा करावी लागणार आहे. येत्या २४ जानेवारीला अंतिम नामांकनं जाहीर केली जाणार असून पुरस्कार सोहळा २६ फेब्रुवारी रोजी पार पडणार आहे.

याआधी २००९मध्ये डॅनी बोएलच्या 'स्लमडॉग मिलेनियर' चित्रपटातील 'जय हो' या गीतासाठी रेहमानला 'ओरिजिनल स्कोअर व ओरिजिनल साँग' अशा दोन्ही विभागांत ऑस्कर मिळाले होते. याशिवाय, 'इफ आय राइज'साठी त्याला ऑस्कर नामांकनही मिळाले होते.