जावेद अख्तर यांच्या आक्षेपावर निर्मात्याचं स्पष्टीकरण

मुंबई:

ओमंग कुमार दिग्दर्शित 'पी.एम नरेंद्र मोदी' या आगामी चित्रपटात गीतकार जावेद अख्तर यांचे नाव श्रेयनामावलीत लिहिण्यावरून उद्भवलेल्या वादावर निर्माते संदीप सिंग यांनी पडदा टाकण्याचा प्रयत्न केला आहे. त्यांनी ट्विट करत या सगळ्या प्रकाराबाबत खुलासा केला आहे.

'पी.एम नरेंद्र मोदी' या बायोपिकचा ट्रेलर प्रदर्शित झाल्यानंतर या चित्रपटातील गाणी ख्यातनाम गीतकार जावेद अख्तर आणि समीर यांनी लिहिल्याचं जाहीर करण्यात आलं. चित्रपटाच्या अधिकृत पोस्टरवर तसा त्यांचा नामोल्लेख करण्यात आला. प्रत्यक्षात मात्र, जावेद अख्तर आणि समीर या दोघांनीही या चित्रपटासाठी गीतलेखन केलेलं नाही. तसं त्यांनी जाहीरपणे सांगितलेलं आहे. या सगळ्या गोंधळाबाबत खुलासा करताना चित्रपटाचे निर्माते संदीप सिंग यांनी लिहिले की,'जावेद अख्तर यांची काही जुनी गाणी चित्रपटात समाविष्ट केलेली आहेत. जावेद अख्तर यांनी लिहिलेली १९४७: अर्थ' या चित्रपटातील 'ईश्वर अल्लाह' आणि 'दस' चित्रपटामधील 'सुनो गौर से दुनियावालो' ही गाणी चित्रपटात वापरण्यात आली असल्यानं श्रेयनामावलीत त्यांचं नाव लिहिलंय.'

पंतप्रधान मोदींचा हा बायोपिक ५ एप्रिलला प्रदर्शित होणार आहे. यात विवेक ओबेरॉय मुख्य भूमिकेत असून बोमन इराणी, मनोज जोशी, झरिना वहाब हे कलाकारही दिसणार आहेत.