कुलदीप सेंगर आजारी कधी पडणार?: जावेद अख्तर

मुंबई: उन्नाव बलात्कार प्रकरणी भाजपचा निलंबित आमदार कुलदीपसिंह सेंगर याला तीस हजारी कोर्टानं शुक्रवारी जन्मठेपेसह २५ लाख रुपये दंडाची शिक्षा सुनावली. कोर्टानं सेंगरला शिक्षा सुनावल्यानंतर प्रसिद्ध गीतकार जावेद अख्तर यांनी खोचक टिप्पणी केली आहे. तो आता किती लवकर आजारी पडतो आणि त्याला कधी रुग्णालयात दाखल केलं जातं हे पाहावं लागेल, असं ते म्हणाले.

उत्तर प्रदेशातील उन्नाव बलात्कार प्रकरणी भाजपचा निलंबित आमदार कुलदीपसिंह सेंगर याला दिल्लीतील कोर्टानं शुक्रवारी जन्मठेपेची शिक्षा सुनावली. जिल्हा न्यायाधीश धर्मेश शर्मा यांनी त्याला २५ लाख रुपये दंडही ठोठावला असून, ही रक्कम एका महिन्याच्या आत भरण्याचे आदेश दिले आहेत. दंड वसूल केला गेला नाही, तर फौजदारी संहितेनुसार उत्तर प्रदेश पोलिसांना राज्याच्या तिजोरीतून ही रक्कम भरावी लागेल, असंही कोर्टानं बजावलं.



उन्नाव बलात्कार: कुलदीप सेंगरला जन्मठेप

जयपूर बॉम्बस्फोट: चारही आरोपींना फाशीची शिक्षा

'दोषी कुलदीपसिंह सेंगरला जन्मठेपेची शिक्षा सुनावण्यात येत आहे. याचा अर्थ भारतीय दंड संहितेच्या कलम ३७६ (२) अंतर्गत त्याला त्याचे उर्वरीत आयुष्य तुरुंगवासात घालवावं लागेल,' असं कोर्टानं सांगितलं. लोकसेवकाने त्याच्या पदाचा गैरफायदा घेऊन महिलेवर बलात्कार केल्यासंदर्भात भारतीय दंड संहितेचे कलम ३७६ (२) आहे. सेंगर यानं २०१७मध्ये पीडितेवर अत्याचार केला होता. त्या वेळी पीडित तरुणी अल्पवयीन होती. 'प्रकरणाचे गांभीर्य कमी होईल, असे कोणतेही घटक कोर्टाला आढळून आलेले नाहीत. सेंगर हा लोकसेवक होता आणि त्याने लोकांच्या विश्वासघात केला,' असे सांगून न्यायाधीशांनी सेंगर याने शिक्षेबाबत सहानुभूतीने विचार करण्यासाठी दाखल केलेला अर्ज फेटाळला.

सेंगरला कोर्टानं शिक्षा सुनावल्यानंतर गीतकार जावेद अख्तर यांनी यावर टिप्पणी केली आहे. बलात्कारी कुलदीप सेंगरला कोर्टानं जन्मठेपेची शिक्षा सुनावली आहे. आता तो किती लवकर आजारी पडतो आणि त्याला रुग्णालयात दाखल केलं जातं हे पाहावं लागेल, असं ट्विट अख्तर यांनी केलं आहे. सेंगरबद्दल टिप्पणी करतानाच, जावेद अख्तर यांनी भाजपला टोला लगावल्याचं मानलं जात आहे. बलात्काराचे आरोप होण्यापूर्वी सेंगर हा भाजपचा आमदार होता. दरम्यान, याआधीही बलात्काराचे आरोप झाल्यानंतर भाजपचा माजी नेता चिन्मयानंद हा देखील रुग्णालयात उपचारासाठी भर्ती झाला होता.