'जुडवा-२'चा ट्रेलर झळकला

मटा ऑनलाइन वृत्त । मुंबई

डेव्हिड धवनच्या बहुप्रतीक्षित 'जुडवा-२' चित्रपटाचा ट्रेलर अखेर आज झळकला असून या ट्रेलरने चित्रपटाची उत्सुकता आणखीच ताणली गेली आहे. हा चित्रपट २९ सप्टेंबर रोजी प्रदर्शित होणार आहे.

वरुण धवनची प्रमुख भूमिका असलेला 'जुडवा-२' हा चित्रपट सलमान खानच्या १९९७ मध्ये प्रदर्शित झालेल्या जुडवा चित्रपटाचा सीक्वेल आहे. जुडवामध्ये करिष्मा कपूर आणि रंभा या दोघी सलमानच्या नायिका होत्या तर जुडवा-२ मध्ये जॅकलीन फर्नांडिस आणि तापसी पन्नू या दोघी वरुणसोबत भूमिका साकारत आहेत.

जुडवा-२ मध्ये वरुण धवन डबलरोल साकारत असून मनोरंजनाचा डबल धमाका अनुभवायला मिळेल असे ट्रेलरवरून दिसत आहे. तीन मिनिटांचा ट्रेलर आज झळकला असून टन टना टन आणि ऊंची है बिल्डिंग ही मूळ जुडवातील दोन गाणी या चित्रपटातही नव्या ढंगात दिसणार आहेत. प्रेक्षकांना पोटभरून हसायला लावणाचा मनोरंजनाचा मोठा खजिना या चित्रपटात असेल हे ट्रेलरवरून स्पष्ट झाले आहे.