तुम्हीच बनवा तुमची स्टाइल!

ज्ञानेश्वरी वेलणकर, कॉलेज क्लब रिपोर्टर

बेधडक स्वभाव, उत्तम अभिनय यामुळे बॉलिवूडची ‘क्वीन’ बनलेल्या कंगना रनौटसाठी फॅशन हे व्यक्त होण्याचं माध्यम आहे. ‘जे कपडे आपल्याला स्टाइल आणि कम्फर्टचा मेळ अचूक मेळ साधून देतात तेच तुमच्यासाठी फॅशनेबल आहेत’, असं तिनं मटाशी गप्पा मारताना सांगितलं.

> तरुणाई तुझ्याकडे 'फॅशन डिवा' म्हणून बघते. तुझ्यासाठी फॅशनची व्याख्या काय आहे?
- माझ्यासाठी फॅशन म्हणजे व्यक्त होण्याचं एक माध्यम आहे. ज्या प्रकारे काही लोकं नृत्यातून किंवा गायनातून त्यांच्या भावना व्यक्त करतात, तसं मी माझ्या फॅशनमधून व्यक्त होते. सुटसुटीत कपडे वापरायला मला नेहमी आवडतं. जे कपडे आपल्याला स्टाइल आणि कम्फर्टचा अचूक मेळ साधून देऊ शकतात, ते खऱ्या अर्थाने तुमच्यासाठी फॅशनेबल असतात.

> रॅम्पवरचा तुझा पहिला अनुभव आठवतो का?
- आयुष्यात पहिल्यांदा रॅम्पवर पाय ठेवला तो क्षण नक्कीच स्पेशल होता. तो कार्यक्रम छोटा होता, तरी मला त्यावेळी खूप भीती वाटली होती. आता इतके फॅशन शो करून देखील रॅम्पवर पाय ठेवताना धडधड वाढतेच. फरक इतकाच आहे की तेव्हा माझा आत्मविश्वास डळमळीत होता आणि आता तो ठाम आहे.

> हॉलिवूडमध्ये पदार्पण करण्याचा काही विचार?
- मी असं ठरवून काही करत नाही. त्यामुळे पण भविष्यात एखादी चांगली आणि आव्हानात्मक भूमिका मिळाली तर त्याला न्याय देण्याचा पूर्ण प्रयत्न करीन.

> मॉडेलिंगमधून अभिनयकडे जाण्याचा मार्ग सोपा आहे असं अनेकांना वाटतं. तुझं काय मत आहे?
- माझा मते मॉडेलिंग आणि अभिनय या दोन भिन्न गोष्टी आहे. त्यामुळे त्यांची सरमिसळ करू नये. दोन्ही क्षेत्रांमध्ये आवश्यक असणारी कौशल्यही वेगळी आहेत. एखादी मॉडेल चांगली अभिनेत्री होईलसुद्धा. पण याचा अर्थ तिचा प्रवास सोपा होता असं बिलकूल नाही. कुठलीही गोष्ट करायला त्याची पूर्ण माहिती असणं आणि नियमितपणे सर्व करणं हे महत्त्वाचं आहे. त्यामुळे दोन्ही क्षेत्रं तितकीच आव्हानात्मक आहेत.

> फिटनेस राखण्यासाठी तू काय करतेस?
- माझ्या मते प्रत्येकाने त्याच्या शरीराची काळजी घेणं फार महत्त्वाचं आहे. त्यामुळे नियमित व्यायाम आणि खाण्यावर नियंत्रण आवश्यक आहे. 'इन शेप' राहण्यासाठी मी योगसाधना करते. त्याचबरोबर पूर्णपणे शाकाहारी आहार घेते. मानसिक संतुलन सांभाळण्यासाठी मी ध्यानधारणा करण्यावर आणि आपल्या आंतरिक तेजाशी ओळख करून घेण्यावर भर देते.

> अनेकांसाठी प्रेरणास्थान बनलेल्या कंगनाच्या आयुष्याचा मंत्र काय आहे?
- जिवंत असण्याची भावनाच मुळात इतकी प्रेरणादायी असते की दुसरीकडे कुठे बघायची गरजच मला भासत नाही. मी सतत स्वतःला या गोष्टीची आठवण करून देते की आजचा हा जो दिवस मला मिळाला आहे, जे अन्न मला मिळत आहे, ज्या प्रिय व्यक्तींचा सहवास मला लाभत आहे हे सगळं अनेकांच्या नशीबी नाही आहे. मी भाग्यवान आहे आणि त्यामुळे लाभलेल्या प्रत्येक क्षणाचा मी पुरेपूर वापर केला पाहिजे.

> ३१ डिसेंबर साठी तुझे काय प्लॅन्स आहेत का?
- नवीन वर्षासाठी काही खास प्लॅन्स केले नसले तरी मुळातच मला फिरायला खूप आवडत असल्याने यंदा नवीन वर्षाचं स्वागत मी एखाद्या रम्य ठिकाणी फिरायला जाऊन करीन असा माझा मानस आहे.