करीना-सैफच्या घरी अवतरले 'छोटे नवाब'

मटा ऑनलाइन वृत्त । मुंबई

'सैफिना' म्हणून बॉलिवूड जगतात ओळखल्या जाणारे सैफ-करीना गेले अनेक दिवस ज्या पाहुण्याची आतूरतेनं वाट पाहत होते, तो आज सकाळी अवतरला आहे. करीनानं आज सकाळी मुलाला जन्म दिला असून बाळ-बाळंतीण सुखरूप असल्याचं समजतं. या 'छोट्या नवाबां'चं नामकरण तैमूर अली खान पतौडी असं करण्यात आलं आहे.

मुंबईच्या ब्रीच कँडी हॉस्पिटलमध्ये सकाळी साडेसात वाजता करीनाची डिलिव्हरी झाली. त्यानंतर सैफ आणि करीनानं ही 'गुड न्यूज' प्रसारमाध्यमांना कळवली असून हितचिंतकांचे, चाहत्यांचे आभार मानले आहेत. आम्हाला मुलगा झाल्याची बातमी तुमच्यासोबत शेअर करताना आम्हाला आनंद होतोय. गेले नऊ महिने तुमच्याकडून जे सहकार्य, पाठिंबा आणि शुभेच्छा मिळाल्या त्याबद्दल धन्यवाद, अशा भावना 'सैफिना'नं व्यक्त केल्यात.

करीना आई झाल्याची बातमी सिनेवर्तुळात पसरली असून तिच्यावर आणि सैफवर अभिनंदनाचा वर्षाव सुरू आहे.
#TaimurAliKhan ❤️❤️❤️❤️❤️ — Karan Johar (@karanjohar) December 20, 2016