मुंबई आणि कोकणचे नाते अनोखे आहे. हे नाते अधिक दृढ बनवले ते कोकण रेल्वे आणि त्यावर धावलेल्या पहिल्या ‘कोकणकन्या’ या ट्रेनने. कोकणच्या भूमीत नेणाऱ्या या ‘कोकणकन्ये’ची महती सांगणारे एक गीत टाइम्स म्युझिक मराठीने नुकतेच ऑनलाइन प्रदर्शित केले आहे. या गाण्यामध्ये केवळ ‘कोकणकन्ये’चे दृक आणि श्राव्य वर्णन आले नसून निसर्गसंपन्न कोकणभूमीही दाखवण्यात आली आहे. नामवंत गायिका पद्मश्री पद्मजा फेणाणी जोगळेकर यांनी हे गीत गायले असून त्यांनीच या गीताला संगीत दिले आहे. शुभदा सुभेदार यांनी या गीताचे बोल लिहिले असून सागर पगार यांनी गीताचे चित्रीकरण केले आहे.
तसे पाहिले तर ट्रेन ही आपल्याला अनेक चित्रपट तसेच गीतांमधून भेटली आहे. कधी ‘बर्निंग ट्रेन’ बनून तर कधी मामाच्या गावाला नेणारी आणि झुकझुक चालणारी ‘अगिनगाडी’ बनून. ट्रेनचे आपल्या जीवनातले महत्त्व आजही अबाधित आहे. त्यातही बाहेरगावी जाणारी ट्रेन असेल तर तिच्याबद्दल अधिक ममत्व असते. कोकणचे निसर्गसौंदर्य सांगत त्यातून माहेरवाशिणीप्रमाणे मुक्तपणे विहरणाऱ्या ‘कोकणकन्ये’ची गोष्ट सांगणारे हे गीत म्हणूनच वेगळे ठरते.
कोकणावर निरतिशय प्रेम असणारे वीरेंद्र उपाध्ये या गीताचे सहनिर्माते आहेत. आपल्या जीवनातले अतिशय महत्त्वाचे आणि उत्साहवर्धक असे हे चित्रीकरण असल्याचे मत त्यांनी व्यक्त केले.
‘कोकणकन्ये’च्या माध्यमातून कोकणच्या निसर्गसौदर्याचे दर्शन सागर पगार व त्यांच्या टीमने उत्तमरित्या घडवले आहे. सागर यांच्या मते मुळातच कोकण हे अतिशय सुंदर, मनमोहक असल्याने चित्रीकरणाच्या वेळी वेगळे काही करण्याची गरज लागली नाहीत. याशिवाय चित्रीकरणादरम्यान त्यांना नवीन अनुभव आणि आनंद मिळाला.
गायिका पद्मश्री पद्मजा फेणाणी-जोगळेकर यांनी या गीताला संगीतबद्ध केले आहे. त्यांच्या सुमधुर आवाज आणि संगीतामुळे हे गीत अधिक खुलले आहे. हे गीत गात असताना आपल्याला अतिशय आनंद आणि समाधान मिळाल्यामुळेच हे गाणे खऱ्या अर्थाने जिवंत झाले असल्याची भावना पद्मजाताईंनी व्यक्त केली.
‘कोकणकन्या’ आणि कोकणच्या सौंदर्याची प्रत्यक्ष अनुभूती घेण्यासाठी आजच हे गीत ऐका आणि डाऊनलोडही करा. बघा, तुम्हालाही क्षणार्धात कोकणात पोहोचल्यासारखेच वाटेल!
Disclaimer: Content Produced by National Projects, OMS Div of Times Internet Ltd