नाहीतर मी आत्महत्या करेन... केआरके

मटा ऑनलाइन वृत्त । मुंबई

'माझं ट्विटर अकाऊंट पुन्हा सुरू करा, नाहीतर मी आत्महत्या करेन,' अशी धमकी स्वयंघोषित चित्रपट समीक्षक केआरके उर्फ कमाल आर खान यानं ट्विटरला दिली आहे.

बॉलिवूडमधील अभिनेत्रींबद्दल सतत आक्षेपार्ह ट्विट आणि नव्या चित्रपटांबद्दल 'वाट्टेल ते' लिखाण करत असल्यामुळं वादग्रस्त ठरलेल्या केआरकेचं अकाऊंट काही दिवसांपूर्वी ब्लॉक करण्यात आलं होतं. त्याबद्दल त्यानं आमीर खानला दोष दिला होता. 'सिक्रेट सुपरस्टार'वर टीका केल्यामुळंच माझं अकाऊंट बंद करण्यात आल्याचा आरोप त्यानं केला होता. त्यानं ट्विटरविरोधात न्यायालयात जाण्याचा इशाराही दिला होता. मात्र, आता त्यानं वेगळाच पवित्रा घेतला आहे.


'माझ्या अकाऊंटला ६० लाख फॉलोअर होते. फॉलोअर्स वाढवण्यासाठी मी लाखो रुपये खर्च केले आहेत. पण ट्विटरनं कोणतीही पूर्वकल्पना न देता तडकाफडकी माझं अकाऊंट बंद केलं. त्यामुळं मला मानसिक त्रास होतोय. माझं ट्विटर अकाऊंट त्वरीत सुरू करावं. नाहीतर मी आत्महत्या करेनं,' असा इशारा त्यानं दिला आहे. तसं प्रसिद्धी पत्रकच त्यानं काढलं आहे.