लोकेश हॉलिवूडमध्ये

मराठी सिनेसृष्टीतला एक कलाकार लोकेश गुप्तेही आता हॉलिवूडमध्ये चमकणार आहे. आगामी 'रिमेम्बर एम्नेशिया' या सिनेमात लोकेशने तपास अधिकाऱ्याची भूमिका साकारली आहे.

बॉलिवूडच्या स्टार्सना हिंदी सिनेमानंतर वेध लागतात ते हॉलिवूडच्या चित्रपटांचे. काहींना ही दुर्मीळ संधी मिळतेही. मराठी सिनेसृष्टीतला एक कलाकार लोकेश गुप्तेही आता हॉलिवूडमध्ये चमकणार आहे. आगामी 'रिमेम्बर एम्नेशिया' या सिनेमात लोकेशने तपास अधिकाऱ्याची भूमिका साकारली आहे. या सिनेमाचा काही भाग कोल्हापूर आणि गोव्यात शूट झाला असून, बाकी सिनेमा अमेरिकेत शूट झाला आहे.

मराठी मालिका आणि सिनेमांमधून स्वतःला सिद्ध केल्यानंतर लोकेश बॉलिवूडमध्येही चमकला. 'अकिरा' आणि आणखी काही सिनेमांमध्ये त्याने महत्वाच्या भूमिका साकारल्या. त्यानंतर त्याला हॉलिवूडमध्ये ही संधी मिळाली आहे. भारतीय वंशाचे दिग्दर्शक रवी गोडसे यांचा हा सिनेमा आहे. 'इनसेप्शन', 'अवतार' यांसारख्या सिनेमात काम केलेला दिलीप राव हा अभिनेता सिनेमात मुख्य भूमिकेत दिसणार आहे. तर बाकी तांत्रिक टीम हॉलिवूडची असणार आहे. सिनेमाचं भारतातलं शूट नुकतंच संपलं असून, लवकरच तो प्रदर्शनासाठी सज्ज होईल. मराठी कलाकारांपैकी हाताच्या बोटावर मोजण्याइतपत कलाकारांनी हॉलिवूडमध्ये काम केलं आहे. त्यात आता लोकेशचं नाव आलं आहे.

माझं आधीचं काम बघून मला या सिनेमासाठी विचारणा झाली. मी याला लगेच होकार दिला. दिग्दर्शक आणि सहकलाकार भारतीय वंशाचे असले तरी ते जन्मापासून अमेरिकेत आहेत. त्यामुळे सिनेमासाठी आवश्यक इंग्लिश उच्चार त्यांच्याकडे होता. मीही माझ्या भाषेवर खूप काम केलं. शूटिंग करतानाही अनेक गोष्टी मला शिकायला मिळाल्या. त्यामुळे हा अनुभव माझ्यासाठी खूप खास होता.
लोकेश गुप्ते