मांजरेकरांच्या दुसऱ्या मुलीचंही सिनेसृष्टीत पदार्पण

मुंबई : अभिनेता, दिग्दर्शक महेश मांजरेकरची मुलगी सई मांजरेकर सलमान खानच्या 'दबंग-३' या चित्रपटातून बॉलिवूडमध्ये पदार्पण करणार असल्याची चर्चा असतानाच आता मांजरेकरची दुसरी मुलगी गौरी इंगवले सुद्धा चित्रपटसृष्टीत पदार्पण करणार आहे. 'पांघरूण' या मराठी चित्रपटातून गौरी सिनेसृष्टीत पदार्पण करणार असल्याचं सूत्रांनी सांगितलं.

मराठी सिनेसृष्टीचा लोकप्रिय चेहरा म्हणून महेश मांजरेकरकडे पाहिलं जातं. मांजरेकरच्या पावलावर पाऊल ठेवत त्याच्या दोन्ही मुली अभिनय क्षेत्रात पदार्पण करत आहेत. 'तुमच्या मुलींना जे क्षेत्र आवडतं त्यातच त्यांना काम करण्याची संधी मिळणं ही अभिमानाची गोष्ट असते. सई 'दबंग ३' मधून तर गौरी माझ्या आगामी 'पांघरूण' या चित्रपटातून सिनेसृष्टीत पदार्पण करत आहे. 'पांघरूण'मध्ये गौरी मध्यवर्ती भूमिका साकारणार आहे,' अशी माहिती महेश मांजरेकर यांनी दिली.

यापूर्वी, मराठी चित्रपटांत बालकलाकार म्हणून गौरीने काम केलं आहे. आता एका विधवेची कहाणी असलेल्या 'पांघरुण' या चित्रपटात ती मध्यवर्ती भूमिका साकारणार असून या चित्रपटाद्वारे तिच्या फिल्मी करियरला खऱ्या अर्थाने सुरुवात होणार आहे.