मराठमोळ्या सावनीचं तमिळ गाणं सुपरहिट

Asawari.Chiplunkar@timesgroup.com

Tweet : @asawariMT

‘वेन्निलविन सालैगळील’ या नावाचं एक गाणं सध्या यू-ट्यूबवर चांगलंच व्हायरल झालं आहे. ते गायलंय मराठमोळी गायिका सावनी रवींद्र हिनं. संजय रवी यांनी संगीतबद्ध केलेलं हे गाणं सावनीचं पहिलं तमिळ सिंगल रिलिज आहे. तिची आत्तापर्यंत चार तमिळ सिंगल्स रिलिज झाली असली, तरी या गाण्याला भरपूर लाइक्स आणि व्ह्यूज मिळालेले आहेत. हे गाणं तिनं दोन वर्षांपूर्वीच रेकॉर्ड केलं आहे. मात्र, ते रिलिज दोन वर्षांनी झालं.

अल्बम, स्वतंत्र गाणी यांना मोठा आधार देणाऱ्या तमिळ संगीत क्षेत्राविषयी सावनी म्हणाली, ‘शान, फाल्गुनी पाठक, बाबुल सुप्रियो वगैरे गायकांचे म्युझिक व्हिडिओ आणि अल्बम एके काळी चांगलेच प्रसिद्ध होते. आपल्याकडे सिने संगीतच जास्त आवडीनं पाहिलं/ ऐकलं जातं. हळूहळू मराठीतही सिंगल्सचं प्रमाण वाढतंय. ‘वेन्निलविन’मध्ये केशव विनोद हा माझा सहगायक आहे.’

कॉलेजपासून प्रचंड तमिळ गाणी ऐकणाऱ्या सावनीचं एक कव्हर साँग तिच्या एका मित्रानं ऐकलं. त्यानं तिला फेसबुकवर मेसेज केला आणि या तमिळ गाण्याविषयी विचारलं. गाण्याच्या रेकॉर्डिंगसाठी चेन्नईला यायला लागेल असं सांगितलं आणि त्यानंतर या एका रेकॉर्डिंगनंतर सावनीनं गेल्या दोन वर्षांत सिंगल्सव्यतिरिक्त तमिळ सिनेमांसाठीही जवळपास १५ गाणी गायली आहेत. यातील एक गाणं हरिहरन यांच्याबरोबरचं युगुल गीत आहे. तामराई या दक्षिणेतल्या अत्यंत मान्यवर कवयित्री आहेत. त्यांचं गाणं गायलं, की गायक स्टार झाला, असं मानलं जातं. याच तामराई यांचं गीत गाण्याची संधीही सावनीला मिळाली आहे.

पहिलं तमिळ सिंगल करताना अर्थातच तिला भाषेची चांगलीच अडचण जाणवली. तेव्हा तिनं हे रोमँटिक गाणं चक्क मराठीत लिहून घेतलं. तिथल्या लोकांबरोबरच्या कामाच्या अनुभवाविषयी सावनीनं ते खूप शिस्तीचे लोक असल्याचं सांगितलं.

कर्नाटक शास्त्रीय संगीताच्या एका विशिष्ट शैलीनुसारच तिथले गायक - गायिका गात असल्यामुळे तिथल्या संगीतकारांना उत्तरेकडील गायकांच्या आवाजांसह वेगळे प्रयोग करून पाहाता येत असल्याचं सावनी सांगते. ती म्हणाली, ‘आपले आवाज तिथल्या लोकांना अपरिचित असल्यामुळे त्यांना गाण्याचा लगावच वेगळा वाटतो. आपल्यालाही त्यांच्या पद्धतीनं गायची सवय नसल्यामुळे आपणही कर्नाटकी पद्धतीचं गाऊन फ्रेश होतो.’ या वेगळेपणाचा फायदा मराठीत प्रयोग करून पाहण्यावरही होत असल्याचं सावनीनं सांगितलं. तिनं नुकतंच रोहन रोहन यांच्याकडे एक आयटम नंबर गायलं असून, ‘दोस्तीगिरी’ या सिनेमात आनंद शिंदे यांच्यासह एक गाणं गायलं आहे. ‘डॉ. रखमाबाई’ या अनंत महादेवन यांच्या सिनेमातील फक्त दोनच गाण्यांपैकी एक तिचं असून तिनं महंमद इरफान यांच्यासह ड्युएट गात बॉलिवूडमध्येही पदार्पण केलं आहे.