हिंदी वेबसीरिजचे मराठी स्टार

सध्या काही तरुण मराठी कलाकार हिंदी वेबसीरिजमध्ये काम करत आहेत. भाषाबदलामुळे वेगळ्या संस्कृतीतील विविध विषयांशी जोडून घेता येण्याबरोबरच अधिक प्रेक्षकांपर्यंत पोहोचण्याची ही मोठी संधी असल्याचंही त्यांना वाटतं.

मराठी अभिनेता अमेय वाघ एकता कपूरच्या ‘ऑल्ट बालाजी’ प्रॉडक्शनच्या ‘बॉयगिरी’ या हिंदी-इंग्लिश वेबसीरिजमध्ये काम करतोय, तर ‘फोटोकॉपी’ या सिनेमाचा हिरो चेतन चिटणीस अभिनेता आर. माधवनबरोबर ‘ब्रीद’ या हिंदी वेबसीरिजमध्ये दिसणार आहे. ‘पिचर्स’मधून यापूर्वीच प्रेक्षकांसमोर आलेला अभिनेता अभय महाजनही याच वेबसीरिजच्या पुढच्या भागात पुन्हा झळकणार आहे.

चारच दिवसांपूर्वी या ‘ब्रीद’चं शूट संपल्याचं सांगत या वेबसीरिजमधील भूमिकेविषयी चेतन म्हणाला, ‘ही थ्रिलर वेबसीरिज आहे. आर. माधवन आणि ‘काय पो छे’ फेम अमित सध यात मुख्य भूमिकेत आहेत. माझी भूमिका कॉर्पोरेट कंपनीत काम करणाऱ्या तरुणाची आहे, ज्याचं गर्लफ्रेंडवर खूप प्रेम असतं. माझ्याप्रमाणेच आणखी चार-पाच जणांशीही माधवनच्या व्यक्तिरेखेचा जवळून संबंध येतो. आमची आयुष्य एकमेकांना छेद देतात, तेव्हा थरारक गोष्ट सुरू होते.’

‘टेबल नं. २१’ आणि ‘चष्मेबद्दूर’ या २०१३ साली प्रदर्शित झालेल्या दोन्ही सिनेमांचा साहाय्यक दिग्दर्शक मयंक शर्मा ही वेबसीरिज दिग्दर्शित करतोय. कास्टिंग डिरेक्टर रोहन मापुस्कर यांच्यामुळे ही वेबसीरिज मिळाल्याचं सांगताना आर. माधवनबरोबर काम करण्याच्या अनुभवाविषयी चेतन म्हणाला, ‘माधवन शूटच्या पहिल्या दिवसापासून अत्यंत व्यवस्थित बोलायचा. मी दोन वर्षं उटीमध्ये शिक्षणासाठी होतो, तेव्हा तमिळही शिकल्यानं त्यांच्याशी पहिल्याच दिवशी तमिळमध्ये ‘हाय हॅलो’ केल्यावर ते आश्चर्यचकित झाले. त्यानंतर आमचं उत्तम जमलं. त्यांनीही कधी ‘स्टार’ असल्याचा आव आणला नाही.’

‘बॉयगिरीः मेन विल बी बॉइज’ या वेबसीरिजमधील अमेयची भूमिका सहा मित्रांपैकी एक असलेल्या ‘बज्जू’ नावाच्या एका जुगाडू मित्राची आहे. एखाद्याला गरज नसतानाही तो मदतीसाठी तत्पर असतो. ‘ब्रोमान्स’मधील मैत्री, प्रेम, मजा-मस्ती आणि मुलं एकमेकांसह व्यक्त होताना जी भाषा वापरतात, तिचा पुरेपूर भरणा असलेली ही वेबसीरिज आहे.

अमेय आणि चेतन दोघांच्याही मते, प्रादेशिक भाषा सोडून दुसऱ्या भाषेतील आणि विशेषतः हिंदीतील प्रोजेक्ट केल्यानंतर त्या वर्तुळातील माणसं तुमचं काम पाहाण्याची शक्यता निर्माण होते. त्यामुळे पुढच्या प्रोजेक्टसाठी तुमचं नाव सुचवण्याच्या शक्यता वाढतात. आपल्याकडे प्रादेशिक सिनेमा, वेबसीरिज किंवा मालिकांबरोबरच हिंदीतील कामंही देशभर पाहिलं जात असल्यामुळे मोठ्या लोकसंख्येपर्यंत पोहोचण्याच्या शक्यता निर्माण होतात. राष्ट्रीय-आंतरराष्ट्रीय स्तरावरही ओळख मिळते.

मुंबईमध्ये इंग्रजी थिएटर करणारे आकर्ष खुराणा ‘बॉयगिरी’ दिग्दर्शित करत आहेत. मी त्यांच्याबरोबर यापूर्वी इंग्रजी नाटकात काम केलं आहे. त्यामुळे सुरुवातीला त्यांनी मला या नव्या वेबसीरिजबाबत विचारलं. ही सीरिज मिळण्यासाठी मला ‘कास्टिंग काउच’च्या लोकप्रियतेचाही खूप उपयोग झाला.

- अमेय वाघ, अभिनेता