...तरीही मदालसा मिमोह चक्रवर्तीच्या पाठीशी

मुंबई :

महाराष्ट्र टाइम्स.कॉम

अभिनेता मिथुन चक्रवर्ती याचा मुलगा महाक्षय उर्फ मिमोहचं लग्न होता होता राहिलंय. ऐन लग्नाच्या दिवशी पोलीस चौकशीसाठी आल्याने त्याचं लग्न मोडलं. एका भोजपुरी अभिनेत्रीने त्याच्यावर बलात्काराचा आरोप केला आहे. मात्र इतकं सगळं होऊनही मिमोहची भावी पत्नी मदालसा शर्मा त्याच्या पाठीशी ठामपणे उभी आहे. सूत्रांच्या माहितीनुसार, ७ जुलैला रद्द झालेलं हे लग्न आज होत आहे.

सूत्रांच्या माहितीनुसार, मिमोह आणि मदालसा यांचा रजिस्टर्ड विवाह ७ जुलैलाच झाला आहे. याच दिवशी पारंपरिक पद्धतीने त्यांचं लग्न होणार होतं, पण ते रद्द झालं. हा रद्द झालेला लग्नाचा सोहळा मंगळवारी १० जुलैला उटीतील मिथुन चक्रवर्ती यांच्या हॉटेलमध्ये पार पडणार असल्याचं म्हटलं जात आहे.

मिमोह आणि त्याची आई योगिता बाली यांच्यावर भोजपुरी अभिनेत्रीने आरोप करत तक्रार दाखल केली होती. मिमोहवर तिने बलात्कार आणि बळजबरीने गर्भपात करण्याचा आरोप केला आहे. मिमोह आणि योगिता बाली यांनी केलेला अटकपूर्व जामीनाचा अर्ज आधी मुंबई हायकोर्टाने फेटाळला होता. नंतर या दोघांना दिल्ली हायकोर्टात अंतरिम जामीन मंजूर झाला.

सोमवारी मिमोह आणि मदालसा यांच्या लग्नाआधीचा संगीत समारंभही पार पडला. पोलीस तक्रारीमुळे पाहुण्यांच्या यादीत काटछाट करून ती कमी करण्यात आली आहे.

दरम्यान, तक्रारदार महिलेचे वकील नीरज गुप्ता आणि निशा अरोरा यांनी उच्च न्यायालयातदाद मागण्याचा निर्णय घेतला आहे. चौकशीच्या सुरुवातीलाच अटकपूर्व जामीन मंजूर केल्याबाबत त्यांना आक्षेप आहे.