भोजपुरी अभिनेत्याला अटक

मटा ऑनलाइन वृत्त । मुंबई

भोजपुरी अभिनेता मनोज पांडेला बलात्काराच्या आरोपाखाली अटक करण्यात आली आहे. मनोजने लग्नाचे तसेच चित्रपटात काम देण्याचे आमिष दाखवून गेल्या पाच वर्षांपासून वारंवार माझ्यावर बलात्कार केल्याचा आरोप एका भोजपुरी गायिकेने केला असून तिच्या तक्रारीवरूनच चारकोप पोलिसांनी मनोज पांडेला अटक केली आहे.

मनोजसोबत गेले पाच वर्षे ही तरुणी 'लिव्ह इन रिलेशनशीप'मध्ये रहात होती. यादरम्यान एकदा जबरदस्ती तिला गर्भपात करण्यासही भाग पाडण्यात आले, असा आरोप तिने तक्रारीत केला आहे. मनोजने लग्नाचे आमिष दाखवून माझी फसवणूक केली. माझ्याऐवजी त्याने दुसऱ्याच मुलीशी लग्न केले आहे, असा आरोपही या तरुणीने केलेला आहे. १५ सप्टेंबर रोजी तिने मनोजविरोधात चारकोप पोलीस ठाण्यात तक्रार दाखल केली होती. तिच्या तक्रारीवरून पोलिसांनी गुन्हा दाखल केला होता. त्यानंतर पोलीस मनोजचा कसून शोध घेत होते. मोबाइल बंद ठेऊन तो पोलिसांना सतत गुंगारा देत होता. मात्र आज अखेर तो पोलिसांच्या तावडीत सापडला आहे.

मनोज आणि पीडिता दोघेही उत्तर प्रदेशमधील आहेत. पीडित तरुणी भोजपुरी गायिका असून तिने अल्बममध्येही काम केलेले आहे. तर मनोज 'सौगंध गंगा मईया के', 'कईसन पियवा के चरितर बा', 'लहरिया लूट ए राजा जी', आणि 'लाल चुनरिया वाली' यासह अने भोजपुरी चित्रपटांत काम केलेले आहे. त्याने काही हिंदी चित्रपटांतही भूमिका साकारलेल्या आहेत.