तिसऱ्यांदा 'मुंबई-पुणे-मुंबई'

मुंबई टाइम्स टीम

एखादा सिनेमा हिट झाला की पाठोपाठ त्याचे सिक्वेल येतात. हॉलिवूड-बॉलिवूडमध्ये याची अनेक उदाहरणं आहेत. मराठीतही याचं उदाहरण दिसणार आहे ते 'मुंबई-पुणे-मुंबई ३'च्या रुपानं. मराठीत पहिल्यांदाच एखाद्या सिनेमाचा तिसरा भाग येतोय. सिनेमातली मुख्य जोडी, स्वप्नील जोशी आणि मुक्ता बर्वे हेच या तिसऱ्या भागाचं मुख्य आकर्षण असतील. येत्या २८ सप्टेंबरला हा सिनेमा प्रदर्शित होणार आहे.

याविषयी बोलताना दिग्दर्शक सतीश सांगतो की, 'आजवर अनेक सिनेमांचे सिक्वेल आले आहेत, फ्रँचायझी झाल्या आहेत. सिनेमाच्या पुढील भागात सिनेमाची गोष्ट तसंच पात्रंही बदलत असतात. परंतु 'मुंबई पुणे मुंबई'च्या बाबतीत एकाच जोडीची आयुष्याच्या विविध वळणांवरील गोष्ट प्रेक्षकांना पाहायला मिळते आहे. आणि तसा प्रयोग 'मुंबई पुणे मुंबई ३'च्या निमित्तानं मराठीत पहिल्यांदा असं होतोय. गौतम आणि गौरी यांच्या पुढील आयुष्याचं चित्रण सिनेमात करण्यात आलं आहे. त्या भूमिकांचं वय वाढलं आहे.' 'मुंबई पुणे मुंबई'मधले गौतम आणि गौरी यांच्या आयुष्यात काय घडते याची उत्सुकता चाहत्यांना आहे. या सिनेमात दुसऱ्या भागात दिसलेली कलाकार मंडळी तिसऱ्या भागातही दिसणार आहेत.