'माझी ओळख वर्किंग वूमन'
पुणे टाइम्स टीम
'शाहरुख खान आणि मुलांना असलेल्या प्रसिद्धीच्या वलयाचा तुमच्या जीवनावर कसा परिणाम होतो असा प्रश्न मला नेहमी विचारला जातो; परंतु मी नकारात्मकता दूर ठेवूनच काम सकारात्मक गोष्टीच घेते. मी 'वर्किंग वूमन' असून, इतरांसारखंच सामान्य जीवन जगायला मला आवडतं. म्हणून इंटेरिअर डिझायनिंगचा मी पुरेपूर आनंद घेते, मला या कामाविषयी अत्यंत प्रेम आहे,' हे म्हणणे आहे, प्रसिद्ध अभिनेता शाहरूख खानची बायको गौरी खानचं.
'ग्रॅव्हिटस रत्न' या कॉफी टेबल बुकच्या प्रकाशनानिमित्त गौरी नुकतीच पुण्यात येऊन गेली. अमृता फडणवीसही यावेळी उपस्थित होत्या. अभिनेत्री सोनाली कुलकर्णीनं गौरी आणि अमृता यांची मुलाखत घेतली. इंटेरिअर डिझायनिंगमध्ये अगदी छोट्या स्तरावर केलेली सुरुवात, आव्हानात्मक प्रकल्प पूर्ण करताना मिळणारा आनंद याविषयी गौरीनं मनमोकळा संवाद साधला. सोबत, शाहरुख हा पाठीशी कायम उभा राहणारा नवरा आणि उत्तम वडील असल्याचंही नमूद केलं. 'किंग खान'चं ग्लॅमरस करिअर राखत गौरीनं इंटेरिअर डिझायनर म्हणून इंडस्ट्रीत नावलौकिक मिळवला आहे. अनेक नवोदित आणि प्रस्थापित कलाकारांच्या घराचं इंटेरिअर डिझाइन तिनं केलं असून, यामध्ये करण जोहर, जॅकलिन फर्नांडिस, सिद्धार्थ मल्होत्रा तसंच मुकेश अंबानी, राल्फ लॉरेन, रॉबर्ट कॅव्हरी या आंतराष्ट्रीय नामांकित व्यक्तींचाही समावेश आहे.
या मुलाखतीमध्ये तिने 'गौरी खान डिझाइन्स'चा प्रवास सांगितला. ती म्हणाली, की सुरुवातीला अवघ्या ६०० स्क्वेअर फूट जागेत मी स्वत:चं ऑफिस सुरू केलं. व्यवसाय वाढवण्यासाठी केवळ 'शाहरूख खानची बायको' या ओळखीचा उपयोग होऊन चालणार नव्हतं. मला प्रत्यक्षात लोकांच्या आवडीप्रमाणे, मनासारखं घर सजवून त्यांची पसंती मिळवायची होती. त्यात माझे कष्ट होते. कालांतरानं व्यवसाय वाढत गेला. अर्थात या सगळ्यांत शाहरूखचा मोठा पाठिंबा होता.
'देवेंद्र फडणवीस मुख्यमंत्री नसते, तरी मला त्यामुळे काही फरक पडला नसता, कारण मुळातच त्यांचं व्यक्तिमत्त्व मला आवडतं,' असं सांगत अमृता फडणवीस यांनीही आपल्याला सामान्य जीवनच जगायला आवडत असल्याची भावना व्यक्त केली.