कपिल शर्मा-सुनील ग्रोवर वादात 'ट्विस्ट'

मटा ऑनलाइन वृत्त | मुंबई

'द कपिल शर्मा शो'मधील सहकलाकार सुनील ग्रोव्हरशी झालेल्या वादात कपिल शर्मानं नवं ट्विस्ट आणलं आहे. ८ महिन्यांपासून या वादावर चुप्पी साधणारा कपिल नुकताच भरभरून बोलला. सुनीलशी आपलं कधी भांडणच झालं नव्हतं, असं स्पष्टीकरण त्यानं दिलंय.

कपिल शर्माच्या आगामी ‘फिरंगी’ चित्रपटाचा ट्रेलर नुकताच प्रदर्शित झाला. यावेळी सुनीलशी झालेल्या वादावर त्याला प्रसारमाध्यमांच्या प्रतिनिधींनी प्रश्न विचारला. त्यावर या वादावर ८ महिने अवाक्षर न काढणारा कपिल अखेर बोलता झाला. मी व्यासपीठावर सादरीकरणासाठी जात असताना आमचे सहकलाकार चंदन प्रभाकर आणि एका महिला कलाकारामध्ये वाद झाला. या वादानंतर ती महिला कलाकार माझ्याकडे आली. ती रडत होती. त्यावर चंदनला मी खूप ओरडलो. त्याला मारलंही. चंदननंही माझ्या कानशिलात दोन-चार भडकावल्या. आम्ही बालपणीचे मित्र आहोत. त्यामुळं आमच्यात अशा गोष्टी होतच असतात. पण हा कार्यक्रम संपल्यानंतर चंदन बॅग उचलून निघून गेला. पाच दिवसांनंतर परतताना चंदनची विमानात भेट झाली. तेथेही बाचाबाची झाली, असं कपिलनं सांगितलं.

विमानातील वाद मोठा नव्हताच. मीडियानं तो मोठा केला. प्रवासादरम्यान मी खूप तणावाखाली होतो. पण सुनील आणि माझ्यात कोणताही वाद झाला नाही. उलट तो माझा सगळ्यात जवळचा मित्र आहे, असं कपिलनं स्पष्ट केलं. कपिलनं वाद नसल्याचं सांगितलं खरं, पण विमानात नक्की काय घडलं हे सुनील ग्रोवरच्या प्रतिक्रियेनंतरच समोर येईल.