आमिर खानचा 'दंगल' फेसबुकवर लीक

मटा ऑनलाइन वृत्त । मुंबई

आमिर खानचा 'दंगल' सिनेमा एकीकडे बॉक्स ऑफिसवर हिट होत असताना दुसरीकडे सोशल नेटवर्किंग साइट फेसबुकवर मात्र लीक झाला आहे. हाश्मी एएच नावाच्या प्रोफाइलवरून हा संपूर्ण अडीच तासाचा सिनेमा अपलोड करण्यात आला. नंतर मात्र फेसबुकने हाश्मीचे अकाउंट बंद करून टाकल्याचे वृत्त आहे.

हाश्मीने हा व्हिडिओ पोस्ट करताना कमेंट लिहिली की 'जास्तीत जास्त लोकांनी हा सिनेमा शेअर करावा'. फेसबुकवर हो सिनेमा अपलोड होताच चार लाखांहून जास्त लोकांनी तो पाहिला. हाश्मीची मात्र जास्त माहिती मिळालेली नाही. काही मिडिया रिपोर्ट्सनुसार तो पाकिस्तानी नागरिक आहे तर काहींनी तो दुबईचा असल्याचे म्हटले आहे.

पाकिस्तानमध्ये 'दंगल' अद्याप प्रदर्शित झालेला नाही. पहिल्या दिवशी सिनेमाने २९ कोटी ७८ लाख रुपयांची कमाई केली आहे. याव्यतिरिक्त तामिळ आणि तेलगुत या सिनेमाने ५९ लाखांची कमाई केली आहे. देशभरात ४,३०० स्क्रीन्सवर हा सिनेमा प्रदर्शित झाला आहे. अन्य देशांमध्ये एक हजार स्क्रीन्सवर तो दाखवला जात आहे.